Álvarez espera que la ministra puea firmar el pautu "en breve"

La conseyera de Cultura afirmó que les obres del Arte Asturianu van "francamente bien", amás afirmó que namás falta'l Ministeriu de Cultura por roblar el pautu.

Toles instituciones rellacionaes con estos monumentos -Principáu, Arzobispáu d'Uviéu y Conceyos- yá roblaron el pautu pol Prerrománicu n'Asturies, tan solo falta la firma de la ministra de Cultura, Ángeles González Sinde, qu'espera puea facelo "en curtiu tiempu".
 
Preguntada pelos medios, Álvarez fixo estes declaraciones esti llunes mientres la so visita a la Ilesia de Santa María La Real de la Corte n'Uviéu, por cuenta de la restauración del órganu barrocu del templu.
 
Recordó coles mesmes, que la ilesia prerrománica de San Salvador de Valdediós, en Villaviciosa, que visitó apocayá, ye "una obra espectacular" y va poder ser visitada a finales d'añu.

Per otra parte, tamién recordó que'l Muséu Arqueolóxicu, del que dixo que va "espectacularmente bien", "tien fecha d'apertura", pero refugó concretala porque, "quiero dá-yla con día y hora".

Coles mesmes, preguntada poles declaraciones de la ministra de Sanidá, Trinidad Jimenez, nes qu'amosó'l so sofitu a Cáceres como candidatu a la Capitalidá Cultural Europea en 2016, dixo que, nel so casu, yá manifestaron el so sofitu a Uviéu, pero tán esperando a conocer el proyeutu pa marcar que tipu de collaboraciones van facer.