Carabanzo entama’l 13 d’agostu’l V Festival Ástur-Romanu

La Colla Propinde, Mapi Quintana, Dixebra o Vicente Díaz, amás d’actividaes y espectáculos, van convertir Carabanzo nun campamentu ástur ente’l 13 y el 16 d’agostu.

L'Asociación Cultural Moos de Carabanzo presentó güei sábadu, 10 de xunetu el V Festival Ástur-Romanu de La Carisa. La presentación corrió a cargu del alcalde de Ḷḷena, Ramón Argüelles Cordero, y del presidente de l'Asociación, Juan Vázquez, que tuvieron acompañaos pola presidenta de l'Asociación de Muyeres de Carabanzo y otros representantes vecinales y por una delegación de la Fiesta d'Ástures y Romanos de Astorga. Asistieron tamién los lexonarios romanos y guerreros ástures que van protagonizar el festival.

Nesta quinta edición, el Festival va tener más conteníos y de mayor calidá pa responder al ésitu d'anteriores certames, qu’axuntaron a más de 5.000 persones. Pa ello, Carabanzo va tresformase nuevamente nun asentamientu ástur coetaneu de les guerres contra la Roma d'Augusto na Vía Carisa, recreación qu'anguaño va cuntar col concursu de tribus y lexones de Cartaxena, Astorga y Corrolades del Buelna, acompañaes por una delegación de xermanos llegaos dende Alemaña pa lluchar al par de los ástures.

L'apueste del colectivu vecinal de Carabanzo pa conmemorar el quintu aniversariu del Festival Ástur-Romau ye llograr qu'esti certame seya declaráu fiesta d'interés turísticu rexonal.

L'Asociación Cultural Mozos de Carabanzo diseñó una programación de cuatro díes pa esti 2010 que conxuga actividaes y espectáculos. Por casu, tres nueches de conciertos coles actuaciones de los llenizos ‘Los Mokomitas’, ‘La Coḷḷá Propinde’, ‘Mapi Quintana’ y ‘Fala Non Caduca’ al par de figures señeras na música asturiana como Dixebra, Vicente Díaz y Mikel Lee Wolfe. Amás, el grupu alemán Skalden, los astorganos Ness y Djs tamién se van xubir al escenariu de Carabanzo.

El Festival inclúi igualmente pasucais llexonarios, batalles de gladiadores, puyes d'esclavos, teatru, circu y mercáu romanu y talleres d'artesanía. Los neños van recibir amás una atención especial con talleres cuentacuentos y xuegos infantiles nel pobláu ástur. L'escritor ya historiador asturianu, Adolfo Camilo va ser el druida ástur de Carabanzo encargáu de presentar les lleendes de la tribu.

El festival, entamáu pola Asociación Cultural Mozos de Carabanzo nació va cinco años pal espardimientu del enclave históricu de la Vía Carisa y pa la promoción turística de Carabanzo y de la calzada romana.