El TC niega que Cataluña seya una nación en sentíu xurídicu

La sentencia sobre l'Estatut señala que Cataluña nun pue ser nación en sentíu xurídicu, porque namás esiste la Nación, en mayúscula, española, anque sí se trata d'una "idega llexítima".

El TC afirma na sentencia que'l fechu de que los estatutos d'autonomía tengan el so sofitu na Constitución "ye una cuestión tan elemental y de principiu que nun almite discutiniu", polo que da-y sentíu xurídicu a la nación catalana ye "incompatible, por contradictoria" cola unidá y la non dixebra" de la Nación española, sobre la que sofita la Constitución.
  
Seya lo que seya, los maxistraos del Altu Tribunal acepten que pue falase de la nación como una realidá cultural, histórica, llingüística, sociolóxica y hasta relixosa. "Pero la nación qu'equí importa ye única y puramente la nación en sentíu xurídicu-constitucional. Y nesi mesmu sentíu la Constitución nun conoz otra que la Nación española", recalca.
  
A lo llargo de los fundamentos xurídicos, el TC diz nun compartir la visión restrictiva" que tienen sobre la Constitución los recurrentes del Estatut, y defende que la so visión ye más "grande", polo qu'acepta que "en cualesquier contestu que nun seya'l xurídico-constitucional" Cataluña pue presentase como una realidá nacional.
  
Dicha representación pue tener un sentíu ideolóxicu, históricu o cultural, porque tala cosa tien "plena cabida nel ordenamientu democráticu como espresión d'una idea perfectamente llexítima".
  
L'aceptación de la nación catalana -siempres y cuando nun tenga validez xurídica-, el TC  sofítala nel fechu de que la mesma Constitución que da seguranza a les nacionalidaes y rexones" qu'integren España tien un derechu inalienable al so autogobiernu.