La web de RTPA sigue ensin visibilizar l’asturianu

El periódicu dixital de la RTPA vien d’anovar la so imaxe y apueste por una estructura más llimpia y clara, con mayor presencia de TPA y RPA. Sicasí, la llingua sigue arrequexasa.

Ente otres novedaes, el portal n'Internet ufierta la posibilidá de siguir en direuto les emisiones de la televisión y la radio autonómiques al traviés del dispositivu móvil IPhone d'Apple, entama la información nuna canal de noticies ya inclúi un apartáu de Televisión a la carta. Na páxina, hai un espaciu de vídeos a la carta onde van tar los últimos programes emitíos y los conteníos de la sección de “Reportaxes” de TPA Noticies.

La información y l'actualidá siguen siendo'l puntu de referencia del periódicu dixital. Les noticies disponen d'una portada con un submenú con toles canales: Portada, Asturies, España, Internacional, Deportes, Sociedá, Economía, Ciencia y Tecnoloxía, Sucesos y Última hora.

En Noticies, l'usuariu dispon d'un visor pa ver el postreru informativu de TPA. Tamién va haber un llistáu de les canales más visitaes y, nun futuru, van amosase les noticies más consultaes..

Dende la portada del periódicu, la páxina de Televisión inclúi tola programación de la canal A7. Ta previstu nuna segunda etapa incorporar les parrilles de TPA HD y TPA Internet, ya inclusive que la información lléase directamente en televisión al traviés de la guía electrónica de programación.

La renovación realizóse atendiendo a los datos rexistraos pol periódicu dixital, que recibe una media de 7.050 visites diaries (1.057.576 visites ente'l 1 de xineru y el 31 de mayu de 2010). Una gran parte de los usuarios que visiten www.rtpa.es tán interesaos principalmente nes emisiones en directu de TPA, con una presencia tamién significativa de la programación en direuto de RPA, y les noticies de les secciones Asturies y Deportes.

A pesar de les novedaes, la web de RTPA nun aumentó la presencia del idioma propiu, arrequexáu a la seición ‘Estaya d’Asturianu’, con noticies culturales y que nun camudó’l so deseñu, y a la cabecera, onde pue vese’l llogu de RTPA y el nome ‘Radiotelevisión del Principado de Asturias/Radiotelevisión del Principáu d’Asturies’. La llingua sigue ensin tener nenguna presencia dientro de les noticies.