Declaren inconstitucional la llei que prohibe'l matrimoiu gai n'EEXX

Un xuez de distritu del estáu estaounidense de Massachusetts resolvió que la llei nacional que prohibe'l matrimoniu gai nos Estaos Xuníos ye inconstitucional.

El xuez Joseph Tauro dictaminó en favor de los derechos de los homosexuales en relación a dos demandes presentaes contra la Llei de Defensa del Matrimoniu de 1996, conocida como la DOMA.

El gobiernu de Massachusetts negárase a conceder beneficios y sofitos a les pareyes del mesmu sexu del estáu, nel que les uniones civiles d'esti tipu tán dexaes dende 2004, alegando que lo prohibe la DOMA . Otros cuatro estaos -Vermont, New Hampshire, Conneticut y Iowa- dexen los matrimonios ente homosexuales, como tamién asocede en Washington D.C.
  
El maxistráu Tauro amosóse acordies col argumentu del gobiernu estatal y señaló que la DOMA obliga a Massachusetts a discriminar a los sos propios ciudadanos. "El Gobiernu federal, pente medies de la promulgación y el caltenimientu de la DOMA, claramente invade esta afitada provincia del Estáu, y al facelo infrinxe la Décima Enmienda", indicó Tauro na so sentencia. "Por esa razón l'estatutu (la DOMA) nun ye válidu".
  
La Décima Enmienda de la Constitución estaounidense señala que "los poderes non delegaos a Estaos Xuníos pola Constitución, y que nun seyan prohibíos por ella a los estaos, tán reservaos respectivamente a cada estáu o a los ciudadanos".
  
El Departamentu de Xusticia alega que'l Gobiernu federal pue determinar los requisitos pa esclariar les lleis federales, incluyendo aquellos beneficios o sofitos que se destinen a les pareyes de persones del mesmu sexu en matrimoniu.