Xuristes pide a TVE desconexones n’asturianu

Xuristes pol Asturianu vien d’encamentar a RTVE l’adopción de les midíes afayadices pa que’l Centru Territorial d’Asturies realice les sos desconexones n’asturianu.

L’asociación unvió un testu a la Comisión Mista Congresu-Senáu de Control Parllamentariu de la Corporación RTVE, onde afirmen que la falta d’oficialidá nun tien que tener nenguna trescendencia porque l’orixe de la normativa reguladora atópase estramuries del Estáu español.

Asina, recuerden la Declaración Universal sobre Diversidá Cultural  que dio llugar, cuatro años depués, a la Convención sobro la Proteición de la Diversidá de les Espresiones Culturales, onde se fala del respetu a les llingües y les cultures y que foi ratificada pol Estáu.
.
Poro, dende Xuristes, afirmen que nun esiste nenguna xustificación pa dar un tratu estremáu a diversidaes culturales sustancialmente asemeyaes, les cuatro llingües rexonales españoles, “y entá menos pretendiendo sofitar l’actu discriminatoriu n’otra discriminación anterior: la negativa del llexislador a reconocer a una d’elles la condición de cooficial establecida na Constitución”.

Del mesmumou recuerden la Direutiva del Conseyu de Xunión Europea, relativa al exerciciu d'actividaes de radiodifusión televisiva, enanchando nella’l respetu a la diversidá cultural.

N’acatamiento d’estos preceutivos antecedentes llegales, señalen, l’Estáu español incorporó a la so normativa interna’l respetu a la identidá llingüística nes sos actividaes televisives, pente medies de los artículos 3.2.e) de la Llei 17/2006, de 5 de xunu, de la Radio y la Televisión de Titularidá Estatal (“Nel exerciciu de la so función de serviciu públicu, la Corporación RTVE deberá promover la xuntura territorial, la pluralidá y la diversidá llingüística y cultural d’España”) y 5.1 ( “toles persones tienen el drechu a que la comunicación audiovisual incluya una programación n’abierto qu’espeye la diversidá cultural y llingüística de la ciudadanía”) de la Llei 7/2010, de 31 de marzu, Xeneral de la Comunicación Audiovisual.
   
“Nin que dicir tien que nes precedentes declaraciones llegales de respetu a la diversidá llingüística, feches en normativa interna española, nun se fai distingu dalu ente llingües rexonales cooficiales (catalana, gallega y vasca) y llingua rexonal non cooficial (asturiana) por mor del imperativu principiu d’igual dignidá y respetu de toles cultures desixíu pela UNESCO y la Xunión Europea”, solliñen

Xuristes apunta que dientro de Llei de RTVE recuélese que l’Ente estatal cuntará con una cadarma territorial p’ufrir el so serviciu públicu y que les desconexones van facese na llingua propia de la CCAA.

“Tampoco equí la llei fai, nin pue facer, distingos ente llingües rexonales cooficiales (catalana, gallega y vasca) y llingua rexonal non cooficializada (asturiana), faciendo enriba una discriminación negativa pela que se dea peor tratu a la más desprotegida”, afirmen.
 
Poro, l’asociación camienta que la desconexón del Centru Territorial de TVE-Asturies incumple normatives estatales, asina como cuminitaries.  Amás, recuerden que la llingua vien mentada nel Instrumentu de Ratificación por España de la Carta Europea de les Llingües Rexonales o Minoritaries “polo que, cualquiera que seya la vía interpretativa emplegada, ye d’aplicación a la llingua asturiana  nes mesmes condiciones que pa les les otres llingües rexonales”.

Por too ello, Xuristes pol Asturianu encamienta a la Comisión Comisión Mista Congresu-Senáu de Control Parllamentariu de la Corporación RTVE, l'adopción darréu de les midíes afayadices pa que’l Centru Territorial de TVE n’Asturies realice les sos desconexones en bable/asturianu, “llingua tradicional y propia de la Comunidá Autónoma del Principáu d’Asturies”.