Convocantes y PSC discrepen sobre'l lema de la marcha pro Estatut

'Somos una nación. Nós decidimos' ye’l lema de la pancarta que va abrir de la manifestación pro Estatut del sábadu 10 de xunetu, a pesar de la refuga del PSC.

La presidenta de l’asociación organizadora, Òmnium Cultural, Muriel Casals, repitió la postura de la entidá de caltener la pancarta yá que cuenta sofitu de tolos convocantes a la movilización, incluyíu'l PSC qu'agora prefier qu'haya una 'senyera' (bandera catalana) na cabecera, dixo.

Casals repitió la so invitación a que Montilla tea presente na cabecera de la manifestación, xuntu con representantes de les instituciones y entidaes cíviques, polítiques y culturales que yá confirmaron la so asistencia. Sicasí, la presidenta d’Ómnium Cultural afitó que la única manera de sofitar la concentración yera sumase a la pancarta.

El PSC quier la ‘senyera’

El dirixente del PSC, Miquel Iceta, dixo tres la decisión de la Xunta Direutiva d’Ómnium Cultural, que yera necesario que'l presidente José Montilla lidere cola 'senyera' la manifestación contra la sentencia del TC sobre'l Estatut.

Iceta repitió que la bandera de Cataluña ye la que meyor forma de sumar les sensibilidaes de toles persones que puedan asistir a la manifestación, y señaló que la marcha "nun ye de Òmnium, sinón del pueblu de Cataluña que refuga una sentencia".