El Bloque diz que la Llei d’Axuste supondrá la so salida del Gobiernu

El Bloque por Asturies diz que l’aprobación de la Llei d’Axuste del Gastu Públicu ruempe l'alcuerdu de gobiernu robláu y la so aprobación va significar la so salida del Gobiernu.

Esta decisión foi adoptada ayeri pola Xunta Nacional del Bloque y foi fechu pública güei por Pablo Fernández, voceru de la formación nacionalista, que caltien una coalición electoral con Izquierda Xunida y Los Verdes y que cunta con un diputáu nel Parllamentu, Roberto Colunga, que'l vienres va votar en contra de la llei yá que considera insuficientes les enmiendes apautaes pol PSOE ya Izquierda Xunida.

Pal voceru del Bloque, el Proyeutu de Llei pretende un perduru axuste social conformáu por un conxuntu de retayos salariales y sociales ensin precedentes n’Asturies, “qu'afeuten direutamente a los trabayadores públicos, a les persones paraes, a la educación, a la sanidá, a les polítiques sociales y a los ciudadanos que más sofitos precisen nestos momentos”. Los nacionalistes dicen qu’asina'l PSOE quier usar a la esquierda d’airbag pa neutralizar les crítiques sindicales énte el so “xiru a la derecha”.

Clifiquen les midíes de cobardes, inxustes y discriminatories y de llastre pa la crecedera económica y los servicios públicos, “van tener un impactu negativu na economía asturiana que va ver amenorgáu drásticamente’l consumu pol amenorgamientu del poder económicu de los trabayadores públicos”.
 
Los nacionalistes afirmen qu’en vez d’aprobar esi proyeutu p’amenorgar gastos, podríen poner frenu a los sobrecostos del HUCA o del Musel, a la suspensión de les retresmisiones de fútbol o Fórmula 1 de la TPA, al retayu de gastos nel “sacu ensin fondu” del Institutu Adolfo Posada, a los gastos que supon la privatización del serviciu d'informática, o a la paralización de proyeutos “faraónicos multimillonario”.

 El Bloque diz que’l Principáu conviértese con esti proyectu de llei d'axustes en fiel escuderu y correa de tresmisión de les polítiques más xavaces contra'l llamáu estáu del bienestar” en Asturies. “El retayu de xornales y de polítiques sociales ye un ataque a los sectores públicos y un arrenunciu a enfrentar la crisis dende la esquierda”, afirmen.

Los nacionalistes calificaron les enmiendes presentaes pol PSOE ya IX como probe y murnia xustificación pa imponer un perduru axuste social y les polítiques diseñaes pol FMI p'acabar col débil estáu del bienestar.

“Ye una amuesa d'enorme cobardía ser incapaces de plantegar una progresividad fiscal
verdadera y ser solamente capaces de retayar xornales a los trabayadores públicos y xubir impuestos indireutos, como'l IVA, que namás machuquen a los que menos tienen”, solliñó Pablo Fernández. La formación diz que ye intolerable l'arrenunciu a establecer una xubida del IRPF a les rentes mayores de 60 000 euros.

Poro, el Bloque por Asturies refuga frontalmente'l Proyectu de Llei d’Axuste del Gastu,  “representa un axuste duro y antisocial, que ruempe l'alcuerdu de gobiernu robláu y que va acullá toles rayes coloraes posibles”. Afirmen que la so aprobación, nos términos propuestos nestos momentos, va significar la salida del Bloque por Asturies del Gobiernu.