RPA tien 18.000 oyentes al día

RPA rexistra una audiencia de 18.000 oyentes de llunes a vienres, según los datos del segundu informe de 2010 del Estudiu Xeneral de Medios (EGM).

Los resultaos de la radio autonómica del últimu cuatrimestre del EGM suponen un ascensu d'audiencia respeutu a 2009, na que tenía 7.000 oyentes de media de llunes a vienres, y 8.000 nos fines de selmana. Según indiquen dende la propia RTPA, l’aumentu supón un 157,1% d’oyentes qu’en 2009.

RPA supera asina a otres cadenes como Punto Radio, M80, Radio Clásica Rne, Radio5 Todo Noticias y Rock & Gol, que rexistren índices d'audiencia inferiores n'Asturies. Nel cómputu xeneral de radios d'ámbitu nacional, RPA ye una de les cadenes que más xubió n'audiencia mientres l'últimu añu.
 
La RPA y l’asturianu
 
La Radio del Principáu d'Asturies entamó les sos emisiones en pruebes la mañana del ocho de setiembre de 2006, coincidiendo col Día d'Asturies. La radio pública entamó a sonar a les ocho de la mañana col tema musical "Xirandiyes" una adaptación del grupu "Felpeyu" de tres dances asturianes cola que se facía homenaxe a los desapaecíos Carlos Redondo y Igor Medio.
 
La primer emisión de la RPA tapeció a la de Radio Sele, yá que mientres la emisora n’asturianu emitía dende'l 106.5 de la FM con 50 watios de potencia, l'autonómica facíalo dende'l so repetidor principal del Gamoniteiru nel 106.4 con 120.000 watios. Radio Sele tuvo que camudar asina’l so dial pal 106.1 de la FM.
 
Un mes depués, el nueve d’ochobre de 2006, el cantautor Carlos Rubiera presentaba’l primer programa que ponía nes ondes la RPA. A les tres de la tarde, con repetición a les diez de la nueche, entamaba “Abriendo camín”, un programa musical yá desapaecíu onde se percorría la historia de la música asturiana dende’l Surdimientu.
 
Cinco foron los programes musicales d’una hora que s’estrenaron esa selmana, de los que cuatro foron n’asturianu, faciendo pensar a munchos que la llingua diba tener una presencia perimportante na RPA. Sicasí, programes como “Abriendo Camín”, “Canta l’uxu”, presentáu por Xosé Ámbas y precursor de “Camín de Cantares”, o l’ecolóxicu “El mirador d’Urdiales” foron desapaeciendo de la emisión col entamu de la programación en direuto en castellán, emisión que se foi enanchando mientres la programación enllatada n’asturianu diba amenorgando.