TPA2 algama’l so “máximu hestóricu” con un 1,7%

TPA2 algamó’l pasáu domingu una cuota de pantalla del 1,7%, que dende la canal califiquen de record hestóricu. Mientres, un espaciu n’asturianu en TPA1 ye’l más vistu del día.

El pasáu domingu 4 de xunetu, la segunda canal de TPA (A8) tresmitió’l Campeonatu d'Europa de Piragüismu d'Agües Tranquiles, entamáu en Tresona (Corvera). L’espaciu fixo algamar a la cadena, que xeneralmente emite la programación de TPA1 (A7) una hora depués, un 1,7% de cuota de pantalla, el so máximu hestóricu, según indicaron dende la propiu canal.

El programa más vistu del día nes dos canales de TPA foi la gala de ‘Sones’ dedicada a la presentación del discu ‘Antoloxía de la tonada’, qu’algamó un 9,7% de share y 35.000 espectadores d’audiencia media.