Zapatero acusa al PP de llevar ante'l TC too "lo que pierde políticamente"

Zapatero atribúi'l recursu presentáu pol PP contra la nueva Llei del Albuertu a que'l PP lleva ante'l Constitucional "lo que pierde políticamente" y ta convencíu de que'l fallu va ser favorable.

"Tamos viendo una constante dende la Llexislatura anterior, ye probable que tamién d'ésta: que'l PP, lo que pierde políticamente tocantes a mayoría social y parlamentaria, siempres lo traduz nun recursu al Tribunal Constitucional", señaló Zapatero en rueda de prensa posterior al so alcuentru col presidente de Siria, Bashar al Assad, de visita oficial n'España.

Na so opinión, anque los 'populares' "tán nel so derechu" al presentar esti recursu, "les posiciones de fondu de los principios políticos son les que marca la mayoría parlamentaria dientro de la Constitución".
  
"Creo que'l procesu de confirmación constitucional de les lleis que fuimos aprobando foi un procesu continuu y toi convencíu de que lo siguirá siendo", añadió. Nesti sentíu, Zapatero aseguró que se trata d'una llei constitucional" y refugó que'l fechu de tar recurrida vaya a suponer una inseguridá pa les muyeres o los profesionales sanitarios.
  
"Entendemos qu'esi (la constitucionalidá) va ser la resultancia d'estos recursos, que nun crean nenguna inseguridá xurídica", aseguró, pa incidir en que'l testu foi aprobáu poles Cortes Xenerales. Sobre esti asuntu dixo amás, que se trata d'una llei "de prevención, de seguridá y europea" que "ta destinada a evitar embaranzos ensin desear" y "da más garantíes a les muyeres y los profesionales".