PSOE ya IX-BA-Verdes valtaron güei nel parllamentu  la enmienda a la totalidá al proyeutu de Llei de midíes urxentes de contención del gastu. Roberto Colunga nun asistió a la sesión.

Los socialistes votaron a la contra de la enmienda del PP,  mientres qu'IX-BA-Verdes astúvose polo que la enmienda recibió 19 votos a favor, 20 escontra y tres astenciones -ante l'ausencia del diputáu del Bloque por Asturies-. Sicasí, tantu'l PSOE como IX coincidieron en llamentar qu'el "únicu argumentu" de los 'populares' pa oponese a les midíes seyan les empreses públiques" y defendieron que'l proyeutu de Llei garantiza una aplicación más xusta de los recortes y garantiza la calidá de los servicios sociales, educativos y sanitarios.

La diputada del PP, Alejandra Cuétara foi la encargada de defender la enmienda a la totalidá presentada pol so grupu y xustificó la mesma porque consideró que "hai otres fórmules pa desaniciar el déficit públicu". Asina acusó al Gobiernu de crear una alministración paralela pa tapecer más de 560 millones d'euros de deuda" y pa crear "una cadena de munchos eslabones nes distintes contrataciones".
  
"Los votos del PP nunca van tar con ustedes pa midíes como estes porque sería una irresponsabilidá. van talo'l día que decidan finar colos xiringos y con esi tamañu del alministración evitando duplicidades", dixo Cuétara, qu'acusó al PSOE de dilapidar 300 millones d'euros namás nos sobrecostos del Musel y del HUCA. "Y enriba vienen y saquen pechu d'ello", dixo.
  
La 'popular' aneció en denunciar na Xunta los "bien d'espilfarros" del Executivu d'Areces de los que tolos ciudadanos son conscientes, incluyíos los funcionarios que ven "como son castigaos cola baxada de les sos nómines". "Lo que cuesta güei l'emporiu de la radio y televisión asturiana ye xustu lo que supón la baxada de les nómines de los funcionarios", dixo Cuétara.
  
Alejandra Cuétara consideró inxustes y tremendamente discriminatoria la Llei de Midíes de recorte y sorrayó que l'Executivu tienen qu'entender que la xente nun los entienda porque  ta aprobando estes midíes na fecha na qu'anunciaren que yá s'acabó la crisis. "A ustedes viéno-yos fenomenal el decretazu de Zapatero pa nun facer el trabayu que teníen que tener fecho y que yera xestionar meyor. Nun quiero nin pensar lo que diríen si ye a un gobiernu del PP al que se-y asocede baxar el sueldu los trabayadores", dixo Cuétara.
  
Reprochó al Gobiernu qu'optara por una xubida d'impuestos depués de prometer nel Parllamentu que nun lo fadríen. "falamos d'una xubida d'impuestos qu'afecten a les clases medies o baxes", dixo Cuétara qu'añadió que per primer vegada los trés grupos parlamentarios tán d'alcuerdu na necesidá de controlar el déficit públicu. "Agora los déficit qu'ustedes crearon van pagalos los más ruinos, y llevamos años alvirtiéndo-yos d'ello", dixo.

  
El diputáu del Grupu Parllamentariu socialista, Álvaro Álvarez, xustificó'l proyectu de llei nun marcu de crisis mundial. Consideró amás que tolos diputaos tienen la obligación de facilitar el cumplimientu de les lleis y una d'elles ye l'aprobada pol Gobiernu central sobre la baxada los xornales. Nesti sentíu refertó al grupu del PP la so postura.
  
Esplicó tamién que les midíes fiscales previstes pol Executivu asturianu busquen garantizar los servicios sociales, sanitarios y educativos y que tolos ciudadanos faigan un esfuerzu na midida na que son capaces.
  
Llamentó que l'únicu argumentu del PP seya'l non amenorgamientu de les empreses públiques y consideró que "suena más a sida y coartada fácil qu'a un argumentu sólidu y de fondu". "Creo que ye l'únicu motivu que xustificó la enmienda a la totalidá y paezme más una sida y una manera d'escapar del problema", dixo Álvarez, que recordó qu'Asturies ye la segunda comunidá con menor volume d'empreses y organismos públicos.

  
El diputáu d'IX-BA-Verdes, Jesús Iglesias, acusó al PP de defender siempres el mesmu "dogma" d'amenorgar el déficit rápidamente  a cuenta de les midíes que faigan falta, con una cura de caballu p'acabar col déficit en tres años amenorgando'l gastu social, lo mesmo que defende Zapatero".
  
Dixo amás que'l PP sabe perfectamente que'l decretu aprobáu por Zapatero ye de "imperativu llegal" y consideró más xusta l'aplicación del mesmu de manera progresiva, como plantega'l proyectu de Llei. Acusó amás al PP de defender midíes "contradictories".
  
Asina indicó que'l so grupu considera que lo más xusto ye facese cargu una xubida d'impuestos y recuperar dalgunos de los yá desaniciaos. Nesi sentíu criticó les polítiques adoptaes pol Gobiernu de la comunidá de Madrid con nueves deducciones "pa cuatro amigos con nomes y apellíos".
  
Dixo que lo que nun se llogró nos presupuestos d'otros años llogróse agora "por imperativu" y valoró que se vaigan a gravar a les rentes más elevaes. "Falamos d'una xubida selectiva qu'afecta a aquellos que tán en condiciones de faer un esfuerzu más eleváu", dixo Ilesies qu'anecio na necesidá de gravar les rentes de capital.
  
Refirióse tamién al alcuerdu al que se llegó col PSOE pa reordenar l'axuste presupuestariu, talmente que se garanticen los servicios sociales, sanitarios y educativos. "Creo que llogremos un alcuerdu que dexa una aplicación más xusta de los axustes", manifestó.

Desallugu
 
El Plenu tuvo marcáu poles protestes de los emplegaos públicos. Fuera del Parlamentu pitos a la contra l'Executivu y pancartes contraries la baxada salarial. Dientro del Emiciclo un grupu d'asistente allugaos na tribuna d'invitaos tuvieron que ser desallugaos al portar cartelos nos que podíen lleese "Los emplegaos públicos nun somos mercancía" o "Esta democracia nun furrula".
  
La presidenta de la Xunta, María Jesús Álvarez, ordenó'l desallugu de los poco más de cuatro invitaos que portaben los cartelos reivindicativos lo qu'obligó a interrumpir el plenu por poco más de cinco minutos.