Suspenden l’estrenu de ‘Tuxa’

La situación del Teatru Riera de Villaviciosa depués de les llenes de les últimes selmanes, fai que l’estrenu de la obra n’asturianu ‘Tuxa’ nun puea llevase a cabu.

L’estrenu taba previstu pa esti martes 6 de xunetu, a les 22:00 hores. La obra, promovida pol Serviciu de Normalización llingüística de la Comarca de la Sidra y dirixida por José Luis Campa, ye un repasu de la vida y obra de la escritora maliayesa Tuxa Villaverde (Tornón 1882-1934).

Según indica’l direutor de la obra, l’equipu técnicu y artísticu lleva un añu de trabayu y seis meses de duros ensayos col oxetivu puestu nel martes día 6, “un esfuerciu qu’agora vese truncáu”.

José Luis Campa afirma que nadie tal libre d’una catástrofe como les llenes de va díes, pero solliña que toles acciones que se tomaron con posterioridá foron insuficientes. “15 díes depués de l’aguasa llégase a la conclusión de que les butaques nun tán en condiciones pol mugor, nun se tomaron decisiones rápides y el resultáu ye esti, a pesar de les nueses continues denuncies”, señala.

Con too, informen que van buscar otru teatru onde poder realizar l’estrenu y piden ayudes a los programadores.