Darréu solidarízase colos imputaos de la CSI

Darréu quier amosar la so solidaridá pa colos militantes de la Corriente Sindical d’Izquierda, qu’esti xueves pasáu ocuparon na Sindical d’Avilés la sede de FADE.

Los fechos asocedieron, según la organización de moceda, na tarde’l xueves. “Énte la denuncia de la Federación Asturiana d’Empresarios (FADE) les fuercies represives españoles actuaron rápidamente llevando a los afiliaos de CSI a comisaria”, afirmen.

Dende Darréu llamenten los fechos, “pues amusen una vegada más que la maquinaria represiva del Estáu sigue furrulando y obedeciendo ciegamente a les órdenes del capital”. Al empar, quieren dar tola so solidaridá a los imputaos y tol sofitu a los compañeros del sindicatu pa siguir organizándose.

“Camentamos que l’aición del xueves ye una gran iniciativa y val pa espeyar la braera cara d’un sistema onde los supuestos  sindicatos comparten llar social cola patronal qu’amarra a la clas trabayadora”, diz Darréu.

La organización de mocedá desixe que nun haya represalies a los sindicalistes y que seyan retiraes les causes de les que se-yos acusa, que son usuparción de local y daños. Darréu tamién quier facer un llamáu a la mocedá pa movilizase y acudir a la concentración convocada esti próximu martes día 6 a les 9:45 h nel xulgáu d’instrucción d’Avilés.