L’asturianismu entiende

L’asturianismu políticu fai apueste por defender los derechos del coleutivu de lesbianes, transexuales y bisexuales (LGTB), anque nengún partíu tien una agrupación de xente gai.

Tanto’l PAS como UNA amosáronse partidarios de trabayar pa lluchar contra la homofobia que tovía esiste na sociedá. “Ye obligación política de toda organización que reclame pa sí la condición de democrática”, diz el secretariu d’organización d’UNA, Roberto Holgado.

Mientres que dende Xuventú Asturianista, estaya de mocedá del PAS, afirmen que “como organización moderna y progresista”, defenden la igualdá de los derechos de les persones en tolos ámbitos, “qu’anguaño ta prácticamente consiguida no que cinca a la llexislación”, diz Xuan Pandiella.

Sicasí, les dos organizaciones afirmen qu’entá queda muncho por facer p’algamar la plena igualdá de los homosexuales, anque esa igualdá tea conseguida na llexislación.  “Pue esplicase con un símil: pa la llingua asturiana ye importante la oficialidá, pero esta nun lo supón too; l'aprobación  del matrimoniu entre persones del mesmu sexu, ye un pasu, pero nun ta too fecho, yá que la discriminación y ataques puen siguir tando presentes”, afirma Xuan Pandiella.

Roberto Holgado diz que tovía tamos mui lloñe del día nel que les persones del colectivu LGTB puean sentir que la sociedá ye un sitiu afayadizu nel que vivir la so orientación sexual con normalidá, “mientres eso seya asina hai que desendolcar polítiques específiques contra la discriminación y contra la so manifestación más evidente, la homofobia”.

Los dos partíos afirmen que tienen persones del coleutivu LGTB dientro de les sos files, “los militantes gais, lóxicamente, cunten col pesu de cualesquier otru, como nun pue ser d’otra manera”, comenta Pandiella. Mientres que Roberto Holgado diz la militancia d'UNA tien una composición plural, “como'l conxuntu de la sociedá asturiana”.

Colo que nun cuenten nengún de los partíos ye con una estaya de militantes LGTB, como esiste en dellos partíos mayoritarios. Dende UNA afirmen que les polítiques LGTB promuévense dende la Estaya d'Igualdá. “La organización tien un númberu llimitáu d'estayes, les que nos permite la nuesa realidá organizativa, pero sedría interesante desarrollar una Estaya específica”, diz Holgado.