El Conseyu Regular veta a Bodegas Obanca por etiquetar n'asturianu
|
3 Xunetu, 2010 por Damián Barreiro
- Inicie sesión o rexístrese pa espublizar comentarios
El Conseyu Regulador del Vinu de Cangas vetó la presencia del vinu Ḷḷumés de Bodegas Obanca na IV Feria del Vinu de Cangas por tar etiquetáu n’asturianu.
“El pasáu miércoles 31 de xunu recibimos una carta del Conseyu Regulador onde se nos esixía que na Feria teníemos que tapar les etiquetes n’asturianu y nos indicaben que nun podíemos vender el vinu ellí”, confirmó David Marcos, reponsable de la bodega, a Asturies.com.
Ente los fechos, Bodegas Obanca decidió nun participar na Feria. “El problema yera namás con Ḷḷumés por tar etiquetáu n’asturianu, col restu de los productos nun había problema, pero nun tenemos nada qu’esconder, asina que decidimos nun participar”, afirma David Marcos.
El responsable de la empresa canguesa comenta que nun entiende la posición del Conseyu Regulador yá que’l vinu cumple con tola llexislación y ta etiquetáu pol propiu Conseyu Regulador, llevando’l so indicador.
Ḷḷumés, el primer vinu etiquetáu n’asturianu, yá tuviera problemes cola Conseyería de Mediu Rural, que pidió un etiquetáu billingüe. Sicasí, David Marcos apostó pol etiquetáu dafechu n’asturianu
Efrén d'Andrés
Comentarios
Españolismu comu nos peyores tempos del facismu!!!Y tou na Asturies
2010 , ye una vergoña.
Cuento con qu'esta denuncia nun tendría que quedar equí. El problema col asturianu ye que delles veces los betos por motivos llingüísticos acaben ensin investigar. Nesi sen tendría que sabese quien escribió esa carta, quien ye'l responsable del conseyu regulador y si tien conocimientu del fechu y a partir d'esi momentu l'Ayuntamientu de Cangas, que polo que se ye favoratible al tema, tomar dalgún tipu de midida, anque seya pidir una reunión pa conocer los por ques.
Yá ye tiempu de que los que se pongan coloraos con esti tipu de coses seyan les persones intolerantes y non al revés.
Totalmente d'alcuerdu con "ubiña". Inda más, AXA debería tener una carta de pitición d'ayuda por parte de los vinateros.
Yo dende llueu voi mercar esi vinu agora mesmo. Paezme que tenemos "qu'ayudar" a esti tipu d'empreses.
Ye una vergoña. A estes altures y ainda tamos asina ...
Onde pue mercase pa da-y sofitu?
http://www.obanca.com/contacto.htm
Ehí ta'l contactu pa mercar L.lumés o pa mandar un email de sofitu a Bodegas Oubanca.
http://www.meneame.net/story/vino-vetado-etiquetar-asturiano-ast
Ximielgai la información.
El problema ye la normativa estatal d'etiquetáu que obliga a que los campos obligatorios -caducidá, pesu, denominación de venta....- ten en castellán o en billingüe. Esto ye perdificil pol sitiu qu'hai na etiqueta y por que ye una fatada tener que poner un productu, que en munchos casos solo se va vender n'Asturies, en billingüe.
Non. La Llei afita que los productos tradicionales que se faen y distribuyen esclusivamente nel ámbitu d'una Comunidá Autónoma con llingua propia -oficial- nun tienen porqué etiquetar en castellanu. Ye mentira que l'etiquetáu billingüe (con testu en castellanu) seya obligatoriu en tol Estáu.
De toes maneres: ¿y? Talamente eso ye lo que tán cuestionando equí: una llei illegal que torga un derechu civil básicu. Los ciudadanos y empreses que faen estes coses tán reivindicando'l so derechu a usar l'asturianu como llingua normal, vehicular y oficial; el mesmu derechu que tienen toles demás comunidaes llingüístiques y que remanez de la Declaración de los Derechos Humanos y la Declaración Universal de los Derechos Llingüísticos roblada pol Estáu Español (Artículos 10 y 15). Arriendes d'ello, la Llei d'Usu del 98 garantiza 'l llibre usu y la non-discriminación de los ciudadanos asturianos por mandase del idioma. Como digo, estes persones y empreses tán denunciando, n'aición y sacrificiu, la marxinación y la represión que sufrimos sistemáticamete. Ye, a cencielles, resistencia civil y llucha pola llibertá llingüística. Poner como sida la normativa estatal paezme inútil y redundante. Ta claro que'l problema ye la non reconocencia de los derechos civiles de los asturfalantes pol Estáu y les sos lleis.
Qu'un Vinu de Cangas nun pueda tar nuna Muestra de Vinu de Cangas en Cangas por usar la llingua que se fala en Cangas, namás pue definise como apartheid y entendese dende l'auto-odiu o l'aculturación planificada.
El Conseyu Regulador ta cometiendo un grave error que mancha y perxudica pública y claramente la imaxen del sector vitícola cangués. Estes actitúes nun s'entienden yá por una bona parte de los asturianos y namás que consiguen el refugu xeneralizáu. Amás, la competencia nesti sector ye tremenda y la so actitú ye una torga más nel camín d'abrise mercaos d'estos vinos asturianos, entamando pel interior qu'anguaño ye fundamental y básicu. Vendría-yos bien a tolos productores esixir responsabilidaes inmediates pol so propiu interés.
El Conseyu Regulador acaba facer lo peor que podía, ta entafarrando la imaxen del Vinu de La Tierra de Cangas mui gravemente. Un vetu a un vinu por usar l'asturianu na etiqueta ye un INSULTU a los clientes. Si Bodegas Obanca nun va a esa feria YO TAMPOCO. Ye más, dende esti momentu dexo de mercar Vinu de La Tierra de Cangas que nun sea L.lumés. Si quiero otru vinu, anda que nun los hai buenos: alvariños, riveiros, rioxes, Bierzu, Penedés, Riberda Duero, esos son los que voi mercar desde agora entetanto nun se llevante esta prohibición.
El Conseyu Regulador habría igüar el problema, si lu hai, y si non, dimitir, porque nun ta preparáu, como se ve a les clares, pa la responsabilidá que tién encomendada. Y acaba facer una IRRESPOSABILIDÁ.
Esta ye la mio arma como cliente, arma poderosa, y más nestos tiempos de feroz crisis y competencia.
Prestaríame una relación de tiendes o supermercaos onde mercar Vinu L.lumés
Gabis
apúrrovos el mensax de corréu d'info@vinotierracangas.com que m'unviaron depués que yo protestara pol tratamientu dau a Bodegas Oblanca por torga-y presentar vinos etiquetaos n'asturianu:
"En relación conas noticias qu’aparecienon en del.los medios sobre la IV Amuesa del Vinu de Cangas ya la non asistencia de la Bodega Oubanca, la denominación Vinu de Cangas quier deixar claru qu’en dengún momentu se prohibíu l’asistencia de la bodega, senon que namái se l.ly comunicóu a la bodega que dous de los sous vinos, l’Obanca 2009 yal L.lumés 2008, nun podían tar presentes no eventu.
El primeiro d’el.los, Obanca 2009, ya etiquetáu en castel.lanu, nun foi calificáu como Vinu de Calidá de Cangas debíu a requisitos de trazabilidá ya feitura.
El segundu, L.lumes 2008, foi etiquetáu como vinu monovarietal Verdéu Prieto, sicasí acordies conos l.libros oficiales d’esta denominación yía un vinu multivarietal (feito a partir de 4 castras distintas).
El cumplimientu del reglamentu del Vinu de Calidá de Cangas yía imprescindible pa que un vinu se pueda comercializar como tal. Inda más, sabemos que denguna d’estas dúas etiquetas cuntan cona aprebación del departamentu correspondiente de la Conseyeiría de Mediu Rural ya Pesca, non porque nun foran autorizadas senón porque simplemente nun fonon presentadas pa la súa revisión, dalgo qu’ía obligatoriu acordies cono nuesu reglamentu.
En dengún momentu, dende esta entidá nin se puenxo nin se vei poner impedimentu dalu al etiquetáu n’asturianu, outra miente yía un tema no que nun tenemos competencia. La nuesa misión yía controlar l’orixe, la trazabilidá ya la calificación de los vinos ya velar porque l’etiquetáu informe sobre las carauterísticas riales del vinu, l’idioma en que tea feito yía indiferente pa nós, inda hai botellas de Vinu de Cangas con etiqueta n’inglés.
D’outra miente, el nuesu sofitu al asturianu yía evidente cuando dende este ente tamos trabayando pa presentar l’anu qu’entra una nueva páxina web en tres l.linguas: asturianu, castel.lanu ya inglés; yal nuesu boletín fitosanitariu inclui yá enguanu la toponimia n’asturianu aprebada no espediente toponímicu del Conceyu Cangas.
Un saludu,"