Añu nuevu, versión nueva

Dempués de dellos meses de trabayu presentamos a los nuesos llectores una nueva versión d'Asturies.com, o meyor dicho, la primer fase de lo que va ser la nueva Asturies.com, un mediu históricu na rede asturiana pero que precisaba un cambéu radical p’adaptase tanto a les nueves posibilidaes de la rede como a les espectatives de los nuesos usuarios. Ansina que llegaos al momentu nel que tenemos yá iguaes les coraes d'esti nuevu formatu y viendo que les funcionalidaes del nuevu proyectu superen enforma a la versión d’anguaño, decidimos “calcar el botón” y asoleyámoslu yá pa dir amestando nel futuru nuevos servicios según vayan tando disponibles.

Si nun evoluciones al ritmu qu’evoluciona la rede tas condergáu. El dinamismu d’Internet obligate a tar siempre al tantu de les nueves tendencies del mediu y pa nós,  que nel añu 97 decidimos crear esti mediu d’información y divulgación col oxetivu de ser referente na rede con un productu profesional, modernu y en llingua asturiana, podemos dicir que casi ye un requisitu fundacional el tar en primera llínea de les novedaes. El tiempu pasa y nun siempre fuimos quien de tar a l’altura, yá que los nuesos recursos yeren, y son, llimitaos.

Nesta nueva dómina pretendemos meyorar la información y la divulgación qu'ofrecemos, con una más rápida actualización y más variedá nes noticies y pa ello meyoramos abondo daqué que nun ven los llectores, pero ye básico pa da-y axilidá y calidá al productu qu’ufiertamos; tola inxeniería de procesos que fai posible inxertar los conteníos. Tamién queremos potenciar la participación de los nuesos usuarios, pa lo qu’incorporemos d’equí a poco nueves funcionalidaes y incorporar servicios que seyan a facer d’Asturies.com una cruz de caminos de les distintes esperiencies na rede que tengan como puntu en común l’usu de la llingua asturiana. Como siempre, el llistón que ponemos tien un altor considerable pero consideramos que los nuesos usuarios, que lleven más de 10 años enfotaos en nós, merécenlo.

L’oxetivu últimu ye llograr ser bidireccionales, esto ye, nun solo colgar noticies na web sinón que los nuesos usuarios collaboren nes distintes canales que vamos abrir a la so participación, pa que xuntos modelemos la nueva Asturies.com.

De momentu más nada, siacasu  pidimos disculpes por nun ser más esplícitos coles novedaes que van aportar pero consideramos que ye meyor anunciales cuando vean la lluz y nun pecar agora de grandones, por si acasu...

Gracies pola vuesa paciencia.