Defensa premia un documental de TPA sobre la Guerra Civil

El documental de TPA ‘La batalla d'Asturies’, foi galardonáu col Premiu Defensa 2010 na modalidá de Medios de Comunicación Social, na categoría de periodismu audiovisual.

Esti documental, emitíu'l 31 d'ochobre de 2009, forma parte de la serie sobre la Revolución d'Ochobre de 1934 y la Guerra Civil dedicáu al 75 aniversariu de la Revolución y el 70 aniversariu del final de la Guerra Civil.

‘La batalla d'Asturies’ ye un trabayu de TPA en collaboración cola Productora de Programes del Principáu. El documental incorpora una cuidadosa reconstrucción cartográfica, en 2-D y 3-D, de los finxos de la Batalla d'Asturies, plegues y repliegues, movimientos de tropa, estratexa de defensores y asaltantes. Amás, visítense, 70 años depués, los escenarios del enfrentamientu ente republicanos y franquistes colos testimonios d'historiadores y espertos n'estratexa militar.

Estos premios d'ámbitu nacional tienen por oxetu la reconocencia d'aquellos trabayos sobre asuntos rellacionaos cola defensa, la paz y la seguridá que tuvieren espardimientu na prensa escrita, radios o televisiones del Estáu. El galardón, concedíu pol Ministeriu de Defensa, ta dotáu con una figura en bronce de Miguel de Cervantes y 6.000 euros en caúna de les categoríes.

El xuráu, presidíu pol director xeneral de Relaciones Institucionales del Ministeriu de Defensa, Santos Castro, tuvo integráu pola subdireutora de Comunicación del Ministeriu de Defensa, Lula Gómez, y los periodistes Francisco Medina (RNE), Mariela Rubio (SER), Ignacio Escolar (Público) y Roberto Benito (El Mundo).