El peaxe ente Asturies y Lleón va ser dende mañana 22 céntimos más caru

Les tarifes de peaxe de l'Autopista Campumanes-Lleón van encarecese a partir d'esta medianueche de resultes de la variación del tipu del Impuestu sobre'l  IVA del 16 al 18%.

Según datos d'Aucalsa consultaos por Europa Press, la subida va tornar nuna subida de 22 céntimos pa les motocicletes, los turismos, furgones y furgonetes y microbuses que circulen pol itinerariu entendíu ente Campumanes y Lleón o Onzonilla, que van pasar a pagar 10,80 euros.

Por esi mesmu trayeutu los vehículos pesaos del grupu 1 -camiones, autocares y turismos, furgones, furgonetes y microbuses con remolque d'un exe con rueda ximielga- y del grupu 2 -camiones y autocares a partir de cuatro exes y turismos, furgones, furgonetes y microbuses con remolque a partir de dos exes y polo menos un exe con rueda ximielga- tendrán qu'abonar 13,70 y 17,55 euros caún.
  
Cola aplicación del nuevu tipu los nuevos precios queden como sigue: 3,95 euros ente Campumanes y Vil.lablinu pa vehículos lixeros, y 5 y 6,35 euros pa pesaos; 6,80 euros ente Campumanes y La Madalena pa vehículos lixeros y 8,60 y 10,95 pa pesaos; 4,20 euros ente Lleón y La Madalena pa llixeros y 5,30 y 6,75 pa pesaos.
  
Amás el que circulen ente Lleón o Onzonilla y Viḷḷablinu van pagar 6,85, 8,70 y 11,20 en función del grupu y a los vehículos qu'utilicen l'autopista ente La Madalena y Viḷḷablinu va aplicáse-yos un cargu de 2,85, 3,60 y 4,60 -too ello tres la devolución practicada en Viḷḷablinu-.
  
Los usuarios que lo deseen tienen a la so disposición un impresu coles nueves tarifes nes árees de peaxe y nes oficines de la Sociedá Concesionaria nel Parque Empresarial Asipo II, en Llanera.
  
Fuentes d'Aucalsa desconocen si, tres esta revisión, les tarifes volverán revisase nel mes d'avientu p'adaptales a la subida del IPC, como se fizo nos ultimos años, previa autorización del Ministeriu de Fomentu. L'añu pasáu más de 9.000 vehículos circularon diariamente pola AP-66, una cifra lixeramente inferior a los 9.997 que lo ficieron nel 2008, "por mor de la crisis".