Montilla: "Nun me siento derrotáu, pero sí maltratáu"

El presidente de la Generalitat, José Montilla, espunxo esti miércoles los sos sentimientos tres el recorte del Estatut pel Constitucional : "nun me siento derrotáu, pero sí maltratáu".

"A ver si somos a atopar el camín pa recuperar lo que'l pueblu votó", aseguró Montilla nuna de les sos intervenciones na sesión de control al Gobiernu catalán en sede parllamentaria. Asina, volvía manifestar que va facer tolo posible pa llograr que sigan vixentes per otres víes toos aquellos artículos declaraos inconstitucionales pol Altu Tribunal.

Joan Puigcercós (ERC) mostróse partidariu d'esplorar estes víes alternatives que propón Montilla. "Ye bono trabayar p'algamar aquello que se perdió", anque'l republicanu indicó que tres el recorte, a los catalanes namá-yos queda una posibilidá: la independencia.
  
Puigcercós indicó que yá nel 2006 ERC inclinóse pol 'non' nel referendu del Estatut al considerar insuficiente un testu aprobáu qu'agora quedó "tocáu y baltáu", non yá polos recortes, sinón poles interpretaciones que van facer los maxistraos de los artículos relativos a llingua, financiación, billateralidad, infraestructures y reconocencia de los símbolos nacionales, ente otros puntos.
  
Jaume Bosch (ICV-EUiA) indicó qu'el TC suma a la crisis económica otra d'institucional "de consecuencies imprevisibles" que cuestiona'l pautu constitucional de 1978, diagnósticu que tamién apreció'l líder de CiU, Artur Mas.
  
Ante esta situación, Bosch encamentó a los sos socios de PSC y ERC y tamién a CiU a nun aceptar l'apoyu del PP nun futuru. Tamién llamentó les declaraciones del presidente de la comisión constitucional del Congresu y ex vicepresidente del Gobiernu, Alfonso Guerra, de la mesma manera que consideró que pese al recorte, los populares nun llogren satisfaer los sos oxetivos, puesto que l'Estatut sigue vixente.
  
Ante les palabres de Bosch, Montilla llamentó "l'ataque feroz" del PP a lo catalán y indicó qu'él nun va ser presidente colos votos de los populares, una afirmación que, al so xuiciu, nun tendría d'estrañar a naide.