IU-BA-Verdes propón obligar al reciclaxe por llei

IU-BA-Verdes propunxo crear una llei qu'establecería la obligación del reciclaxe, lo mesmo a Conceyos o usuarios, y la imposición d'un canon a la eliminación de residuos.

Asina, incluyiría la ellaboración d'un plan de xestión de residuos, coordináu por una Axencia de Residuos d'Asturies, que seDría "complementaria" a Coxersa.
  
Los diputaos autonómicos Jesús Iglesias y Emilia Vázquez presentaron güei en rueda prensa esta proposición de llei, rexistrada na Xunta Xeneral d'Asturies, col fin de cambiar el modelu de xestión de residuos y buscar una alternativa que llevara a Coxersa a "revisar" la decisión de construyir la incineradora.
  
Asina, ún de los principales puntos qu'inclúi la proposición ye la obligación d'entregar los residuos separaos per parte de los productores, "cuando se disponga d'infraestructura y servicios municipal o autonómicu pa ello". Establezse entós "la recoyida selectiva de papel, envases y embalaxes, vidriu y materia orgánico a lo menos per parte de los conceyos". Asina, señala que l'incumplimientu sería "sancionable".
  
Per otra parte, la potencial llei establecería un canon a la eliminación de residuos, yá seya al traviés de vertederos, incluyíos los industriales, a la incineración o a la valorización enerxética.
  
Pa desarrollar esta llei, dotaríase a l'Alministración de dos preseos. Per una parte crearíase l'Axencia de Residuos d'Asturies, que, en palabres de Vázquez, "sería l'encargáu d'executar esta llei, y de promover programes, sovenciones y conductes favorables a una xestión adecuada. Iglesias matizó que nun pretenden "cargase a Coxersa" cola creación d'esta Axencia, "sinón que va ser un instrumentu fundamental, algo más ampliu, qu'utilizaría a Coxersa pal desarrollu de les iniciatives y polítiques".
  
El segundu instrumentu va ser "la ellaboración d'un plan de residuos d'Asturies que sería d'obligáu cumplimientu". 
 
Sustituyir a la incineradora
  
Pa Vázquez, l'oxetivu primordial ye "cambiar la idea de que too ye desechable y tirable, sin nengún compromisu pela nuesa parte p'ameyorar les polítiques de la nuesa xestión", señaló. "Cumpliendo estos oxetivos", añadió, "entenderíamos que procesos como los que se tán poniendo en marcha n'Asturies pa instalar la incineradora nun seríen necesarios".
  
El so compañeru Iglesias foi más allá, y opinó que "si esta norma saliere alantre lo razonable sería llograr un puntu d'alcuentru nel que Coxersa revisare la so decisión (la de la incineradora)". Estimó que tal puntu d'alcuentru daríase nel plazu d'un añu.
  
Vázquez comentó les posibilidaes de creación d'empléu del reciclaxe. Según esplicó, la incineración crearía 30 puestos de trabayu por cada 100.000 tonelaes de residuos, mientres qu'esta otra alternativa xeneraría 241.
  
"Agora mesmo n'Asturies tán perdiéndose 83 millones d'euros por residuos que se tiren a vertederu o que se quemen nun futuru, y que son recuperables y tendríen esi valor nel mercáu", señaló la parlamentaria.
  
Amás, recordó que la incineración saldría más barata y ayudaría a amenorgar la factura de la basura a los ciudadanos.
  
La potencial llei acepta la valorización non enerxética y la enerxética, y diferénciala de la incineración, ye dicir la eliminación por quema. Nesti puntu, Nacho González, voceru de Los Verdes d'Asturies exemplificó: l'usu de los neumáticos pa faer capes de rodadura asfáltica sería non enerxética, y la quema de los mesmos nuna cementera como combustible base, sería enerxética. L'orde de prioridaes según la llei sería: reducción, reutilización, reciclaje, valorización non enerxética, valorización enerxética y eliminación al traviés del vertederu o la incineración.