Cifren nun 70% el siguimientu de la fuelga nel País Vascu

El miembru de la Executiva de LAB Gorka Berasategi cifró güei "nun 70-75% polo xeneral" el siguimientu de la güelga xeneral convocada pa güei nel País Vasco.

El llamáu a la movilización vino d'estos sindicatos al par de STEE-EILAS, ESK, HIRU y EHNE, y per otru llau, de forma autónoma, por CC.OO, contra la reforma llaboral. Pela so parte, la patronal Confebask tachó de "fracasu" la convocatoria.
  
En declaraciones a los medios, Berasategi, acompañáu del miembru de la Executiva d'ELA Xabier Anza, antes de tomar parte na manifestación que los sindicatos nacionalistes fixeron a les 12.00 hores, baxo'l lema '¡Basta d'imposiciones! En defensa de los nuesos derechos', dende'l Boulevard donostiarra, destacó que la respuesta a esta convocatoria "foi impresionante, satisfactoria dafechu, en Gipuzkoa y en Bizkaia onde, en zones onde suel haber dalgún problema l'adhesión al paru foi bien importante".
  
Nesti sen, cifró'l siguimientu del paru sobre un "70-75% por cientu polo xeneral" y felicitóse de que hubiere "una gran adhesión nel tresporte públicu". Al so xuiciu, ello demuestra que "la dinámica sindical que llevamos tien el so caláu y los trabayadores tán cola mayoría sindical".
  
Amás, opinó que'l fechu de que CC.OO convocare tamién fuelga xeneral pa güei, de manera autónoma, "permitió que nun haya un debate que nun tien qu'haber, que ye'l de la división sindical nes empreses". Sicasí, llamentó qu'haya que "falar nos centros de trabayu dando distintos mensaxes y faciendo distintes versiones con un ataque de tal caláu" que se ta produciendo contra los trabayadores.
  
Na manifestación desarrollada polos sindicatos nacionalistes na capital guipuzcoana, con cabeceres que partieron de distintos puntos de la ciudá pa unise nel Boulevard donostiarra, tomaron parte miles de persones que coriaron lemes como 'la llucha ye l'únicu camín', n'eusquera, o 'tamos d'esquiroles hasta los coyones'.
 
Fracasu
  
Pela so parte, la Confederación Empresarial Vasca, Confebask, calificó güei de "fracasu" la convocatoria y aseguró que ta teniendo un siguimientu "llendáu".
  
Según indicó la organización vasca, la incidencia de la fuelga "ta lloñe de ser xeneral y ta teniendo un siguimientu llendáu, con diferencies non especialmente acusaes en función del sector o'l territoriu".
  
Según Confebask, "namás l'actuación de los piquetes alteró, en dellos momentos puntuales, la vida ciudadana pa volver entamar la normalidá darréu dempués", y destacó que "foi llargamente mayoritariu'l númberu de trabayadores qu'acudió con total normalidá al so puestu de trabayu".
  
Por territorios, n'Álava'l siguimientu nel sector industrial foi de "malpenes" un 18 por cientu, en Gipuzkoa del 25 por cientu de los trabayadores, y en Bizkaia na media de les anteriores.
  
Na construcción, "con esceición de delles obres emblemátiques que se vieron obligaes a parar", ta trabayándose "prácticamente con toa normalidá", especialmente en tola obra interior. Nel sector servicios, el siguimientu ta siendo "mínimu".
  
Toos estos datos confirmen, a xuiciu de Confebask, que "l'esfuerzu esplegáu por paralizar la vía principal de cada ciudá y les grandes empreses busquen una notoriedá que les cifres desmienten".
  
Pa Confebask, los datos "demuestren, amás, la distancia con que la ciudadanía contempla les movilizaciones sindicales y la responsabilidá y realismu con que los trabayadores faen frente a una situación económica tan grave como la que sufrimos, na que les güelgues nun constitúin de nenguna manera la respuesta constructiva que de toos s'espera y precisa".
  
"La sociedá vasca ye consciente del enorme esfuerzu que tán realizando les empreses pa caltener les sos plantiyes y de qu'eso nun pue tener como respuesta una fuelga xeneral, y menos tovía dos", acabó.