Areces considera la sentencia "positiva" pal Estáu autonómicu

Areces dixo que la sentencia sobre l'Estatut ye "positiva" pa España, pal Estáu autonómicu y pa Cataluña, anque nun fixo mención al conceutu de 'nación' que reconoz el TC, nin a la refuga de que'l catalán seya preferente sobre l'español o al futuru procesu de reforma del Estatutu asturianu.

"Anque de primeres les fuerces polítiques catalanes refúguenla y siéntanse frustraes pol fallu", afirmó. El xefe del Executivu señaló que la sentencia avala, en llinies xenerales, un gran porcentaxe del articuláu del Estatutu de Cataluña.
  
Argumentó que se trata d'algo positivu pa España porque se pon fin a "una estratexa de tensión y d'enfrentamientu" que'l PP entamare dende l'aprobación del Estatutu y qu'agora demuéstrase que de nenguna manera tenía razón porque de los 136 artículos impugnaos pol PP, namás 14 d'ellos se revisen y un artículu, en concreto'l 97, declárase inconstitucional, que ye'l que se refier al Conseyu de Xusticia de Cataluña. "Y otros 14 artículos contienen tamién reparos o interpretaciones que puen arreglase con cambios que nun afecten a lo sustantivo", apuntó Areces.
  
La organización de la xusticia ye la que concentra la mayor parte del fallu de la sentencia del Constitucional, esplicó'l dirixente asturianu, apuntando que prácticamente les dos terceres partes refiérense a una mesma materia, que ye la referida al Conseyu de Xusticia de Cataluña, que se declara non conforme cola Constitución por problemes de competencia normativa y porque según el Tribunal Constitucional ye la Llei Orgánica del Poder Xudicial la norma a la que correspuende desarrollar esa descentralización del Conseyu Xeneral del Poder Xudicial.
  
"Pero ye cierto tamién qu'una serie d'artículos que'l PP impugnare considérense constitucionales dafechu per parte de dicha sentencia y dexa que l'Estatutu siga aplicándose prácticamente na so integridá con plena normalidá, y da la razón al Gobiernu d'España cuando mostraba tamién el plenu enfotu cola constitucionalidá del testu", dixo Areces.
  
Asina, el mandatariu asturianu señaló que'l PP y el so presidente, Mariano Rajoy, "equivocábense" cuando aseguraben que l'Estatutu 'rompía' España y que yera un testu inconstitucional en caún de los sos renglones y numberoses frases.
  
"Un partíu qu'actúa d'esa forma, sobre la base de desestabilizar el desarrollu autonómicu y descalificar tamién a les instituciones del Estáu, nun merez nenguna confianza y nestos momentos ponse de manifiestu una vez más que namás se mueve por cuenta de degradar la convivencia o erosionar l'actividá de les instituciones del Estáu, sin mirar pol interés xeneral", señaló'l dirixente socialista asturianu.
  
P'Areces, resulta lexítimo que'l PP lu recurra xudicialmente, pero dixo que lo que nun ye normal ye que descalificaren dende tolos puntos de vista lo que significó una votación democrática y una manifestación del pueblu catalán que dempués "corrixóse parcialmente". Dende'l so puntu de vista, una vez que pasen los primeros momentos, va valorase tovía más nel so sen positivu.
  
L'acuerdu del Tribunal Constitucional ye malu pal PP, según Areces, porque, caltuvo, tuvo "xugando a la desestabilización y a la descalificación permanente provocando nel país una especie de fobia anticatalanista, que se demuestra que nun tien fundamentu algún".
 
Testu "fortaleciu"

Tres la sentencia, Areces considera que l'Estatutu d'Autonomía "pue siguir el so camín". Amás, caltuvo que l'Estáu autonómicu sal "reforzáu" y el Tribunal Constitucional, particularmente la so Presidenta, tamién cumplen col so deber "porque l'imperiu de la Llei obliga a toos y prevalez una vez más".
  
Señaló que, polo xeneral, el papel positivu que xugare'l Tribunal Constitucional a lo llargo de tol procesu democráticu, que se punxere en cuestión nestos últimos años, "recupera esi prestixu y nun contestu bien difícil emite una sentencia que pon fin a una rocea y fortalez a última hora la democracia".
  
Pero amás, p'Areces la sentencia permite facer compatible cola mesma la práctica totalidá del desarrollu lexislativu que se fixo en Cataluña del propiu Estatutu y nun ye necesario revisar nenguna llei del Estáu, nin reglamentu, nin decretu de trespasu de competencies, nin nengún alcuerdu, incluyíu'l de financiación.
    
"Porque cuando ún repara les interpretaciones que se faen a dellos aspectos de la financiación autonómica que se defendíen dende l'Estatutu y que facíen referencia a les inversiones en Cataluña o tamién a la participación nel rendimientu de los tributos del Estáu, o delles disposiciones adicionales, sinduda ve qu'eses matizaciones coinciden colo qu'a lo último s'acordó dientro del acuerdu de financiación autonómica y que de primeres, dende Cataluña, pretendía influyir sobre eses temes, como'l de la nivelación", comentó.
    
Tamién la interpretación de delles cuestiones del marcu billateral de negociación ye "positiva" pal dirixente asturianu porque a lo último na sentencia ratifícase que los acuerdos, con independencia de que puea haber relaciones billaterales, tienen que producise nos órganos multillaterales, esto ye, nel Conseyu de Política Fiscal y Financiera, que ye la postura que dende Asturies siempre se defendió.
  
"Práuticamente, el 95% del Estatutu ye perfectamente válidu, asumible y permite integrar munchos más los intereses territoriales del nuesu país nel marcu de la Constitución d'España", acabó Areces.