UNA pide la supresión del Festival Aéreu de Xixón

La vocera d’UNA en Xixón, Yolanda González, critica que'l Conceyu de Xixón  apurra más de 30.000 nel Festival Aéreu  y pide la so supresión del calendariu festivu.

El Festival Aereu ta previstu pal mes que xunetu y según declaró l'Alcaldesa, el Conceyu va a invertir  32.500 euros. “Amás de ser un espectáculu de corte militarista sustituible por otros más baratos y constructivos, supón un auténticu espilfarru nesti momentu de recorte de gastos”, indicó González.

“Ye un marafundiu innecesariu que se celebre un festival aereu con un costu altu, que nun tien nengún raigañu na nuestra ciudá, que perxudica al mediu ambiente y que convierte la sablera nel escenariu d'una parada militar”, señaló la vocera d’UNA.

González tamién quixo llamar l'atención sobre coste pa la ciudadanía, señalando qu’amás de la inversión n'efeutivo hai que tener en cuenta lo qu’apurre'l consistoriu y cuanto cuesta a los xixoneses la infraestructura y la movilización d'efeutivos del Conceyu. La vocera d'UNA afirmó que "n'otres ciudaes suspendiéronse espectáculos semeyantes polos sos altos costos".

Coles mesmes, y xuniéndose a les crítiques arramaes pola Asociación Inxenieros ensin Fronteres, UNA tamién ve positiva la eliminación del festival del calendariu festivu xixonés pol so calter militarista, yá que según Yolanda González “el conceyu ta retayando n'espectáculos d'otru tipu y calteniendo un Festival que, nun mos engañemos, básase na exhibición d'armamentu militar destináu a esaniciar vides humanes”.