Un médicu nun atiende a un home por falar en valencianu

El Síndic de Greuges de la Comunidá Valenciana, José Cholbi, recordó a la Conseyería de Sanidá'l derechu de los ciudadanos a espresase en valencianu.

La midida vien depués de qu'un médicu del centru de salú de San Blai, de Torrent (Valencia), negárase a atender a un paciente que-y falaba nesta llingua.
 
El síndic recibió una quexa per parte d'esti paciente, qu'esplicaba que nuna cita col facultativu del centru de salú, relató-y les sos dolencies en valencianu y ésti exixó-y que-y falare en castellán. Al negase, el médicu abandonó la consulta reclamando "toi fartu de gilipolleces". Tres ello, nun-y atendió nengún otru espertu nin la coordinadora del centru, que nun taba nel edificiu.
  
En recibiendo la quexa, el Síndic pidió esplicaciones a la direición xeneral de calidá y Atención al Paciente, qu'aseguró que'l médicu "en nengún momentu" se negó a atender al paciente, y qu'hásta-y ofreció la posibilidá de buscar a otru facultativu pa facilita-y l'atención sanitaria, ante les sos dificultaes pa establecer una correcta comunicación.
  
Ante ello, el síndic entiende, de primeres, que ye "incuestionable", "y asina lo reconoz l'alministración afeutada", el derechu que-y asistía al promotor de la quexa a espresase en valencianu y de que lu atendieren ensin que se produxere nenguna forma de discriminación por usar esa llingua nin nenguna esixencia de traducción.
  
Amás, indica que de la investigación realizada deduzse qu'esti derechu "nun lu respetó" el personal que taba de serviciu al públicu nel momentu qu'asocedieron los fechos oxetu d'esta quexa.
  
Por esti motivu, el Síndic dirixóse a la Conseyería y recordó-y la obligación de garantizar que, nos servicios públicos directamente dependientes de l'Alministración, les persones que trabayen y que tengan una relación directa col públicu tienen que tener conocencia  abondo del valencianu p'atender "con normalidá" el serviciu que tengan encamentáu, "de manera que nun se produza nenguna discriminación o esixencia de traducción".
  
De la mesma manera, aconséya-y qu'adopte les midíes necesaries, nel ámbitu de les sos competencies, pa garantizar el derechu de los ciudadanos a espresase en valencianu.