El G-20 comprométese a reducir el déficit a la metá

Los cabezaleros del G-20 alcordaron abrir víes destinaes a reponer la recuperación económica y establecer un sistema bancariu más seguru, según recueye la declaración final.

El testu final de la xunta recueye les distintes prioridaes establecíes polos países participantes nel conceyu, que se comprometen a reducir a la metá los sos déficits presupuestarios pal 2013 -pero sin parar el crecimientu económicu--, y anuncien midíes dirixíes a evitar comportamientos aventuraos del sector bancariu --pero que nun provoquen una reducción del creitu-.

Los dirixentes del G-20 acordaron dexar que seya cada país el que decida la so propia política pa reducir el déficit, dexando en manes de cada gobiernu l'adopción de midíes polémiques como la imposición d'una tasa a los bancos que se vieron beneficiaos de los planes de rescate d'últimos del 2008 o la implementación de normes más dures pal sector bancariu.
  
"La principal prioridá del G-20 ye salvaguardar y fortalecer la recuperación y establecer les bases pa un crecimientu sólidu, sostenible y equilibráu pa fortalecer los nuesos sistemes financieros contra les conductes de riesgu", señala'l borrador final del conceyu celebráu esti fin de selmana.
  
Los dirixentes del G-20 dexaron la puerta abierta a que cada país avance al so propiu ritmu y adopte polítiques "estremaes" y "a midida" que dexen algamar les prioridaes polítiques o económiques de cada nación, no que supón un fuerte revés frente a la unidá mostrada nos trés conceyos celebraos dende l'entamu de la crisis financiera, nos que s'acordó la puesta en marcha de dellos billones de dólares pa impulsar la recuperación.
  
Nuna muestra de les discrepancies y de los esfuerzos por algamar el consensu nesta última xunta celebrada en Toronto, los negociadores de les 20 principales economíes desarrollaes y emerxentes precisaron de más de 45 hores pa emitir un comunicáu final del conceyu, señaló'l director del Fondu Monetariu Internacional (FMI), Dominique Strauss-Khan. A manera d'exemplu, nel borrador de la declaración final eliminóse nel últimu minutu una mención especial a China pola cotización de yuan.
  
"Los nuesos retos son tan diversos como les nueses naciones", indicó'l presidente d'Estados Uníos, Barack Obama. "Pero xuntos representamos el 85 por cientu de la economía global y forcemos una respuesta coordinada a la peor crisis económica global de la nuesa época", añadió.
  
El presidente estaoxunidense reconoció que se produxeren divisiones mientres les distintes xuntes calteníes pol G-20 en Toronto, pero destacó qu'a lo último toles naciones participantes demostraren la so capacidá pa unise y trabayar en defensa de los intereses compartíos. "Podemos superar les nueses diferencies", apuntó Obama.
 
La XE celebra'l borrador

La Xunión Europea (XE), nun comunicáu emitíu a l'acabación del conceyu, señaló que la declaración final emitida pol G-20 ye una muestra clara de que'l restu del mundu quedó convencíu de la necesidá d'adaptar les cuentes públiques. "La UE venía a Toronto con una axenda clara. El resultáu del conceyu reflexa l'amplia aceptación de la visión europea", indicaba'l comunicáu.
  
Anque Estados Xuníos pidió paciencia y alertó de qu'una retirada repentina de los planes de rescate podría incendiar la recuperación económica, los países europeos defendieron mientres la reunión de Toronto la necesidá de reaxustar les finances públiques p'aumentar la confianza de los mercaos, algo que consideren esencial pa recuperar el crecimientu.
  
Dende l'últimu conceyu del G-20, celebráu en Pittsburgh el pasáu mes de setiembre, los problemes de deuda de Grecia redirixieron la preocupación de los países europeos sobre l'estáu de les cuentes públiques. Reinu Uníu y Alemaña uniéronse recientemente a Grecia, España, Italia y otros países de menor tamañu na aprobación de planes estructurales p'amenorgar el gastu.
  
La xunta de Toronto presentábase como la penúltima oportunidá, antes del conceyu del G-20 que va tener llugar el próximu mes de payares en Seúl, pa que los dirixentes mundiales se punxeren d'acuerdu n'asuntos como la imposición de normes al sector bancariu, la regulación del sector financieru o les cuotes de representación nel Fondu Monetariu Internacional.
  
El director del FMI, Dominique Strauss Khan, señaló que'l compromisu de reducir a la metá'l déficit pal 2013 yera menos importante que l'adopción de polítiques y normes determinaes que dexen algamar esti oxetivu. "Falar de la reducción del déficit ye simplificar muncho'l problema porque la situación difier muncho ente unos países y otros", dixo. "Toi más interesáu nel fechu de que los países implementen les midíes apropiaes", añadió