La lliteratura asturiana sal del armariu

“El mapa de la homosexualidá na narrativa asturiana ye un mapa urbanu onde se produz l’enfrentamientu ente persona y coleutivu”, diz Pablo Rodríguez Medina.

Na ponencia ‘Averamientu al mapa de Sodoma; El tratamientu de la homosexualidá na nueva narrativa asturiana’ que Pablo Rodríguez Medina ufrió nel II Conceyu Internacional de Lliteratura Asturiana (Uviéu, 2007) y que l’Academia de la Llingua espublizó va poco, l’autor entreguín analiza la lliteratura con temática gai del Surmientu.

“Dos notes son importantes p’alcontrar los ramales que mos lleven al nuestru particular mapa lliterariu de Sodoma; saber que casique siempre l’escenariu va ser la urbe y saber que casique siempre los personaxes que reconocen tales práctiques nun van tar asentaos na cultura tradicional”, diz Medina

Pa l’autor, el tratamientu temáticu de la homosexualidá de manera esplícita ye una nota distinta con tola lliteratura fecha enantes del Surdimientu, onde l’emponderamientu bucólicu y d’acordies a los cánones de la cultura tradicional del mundu rural impedía cualquier mención a un fechu que yera consideráu ún de los peores pecaos y de les peores manches que podíen recayer sobre dalguién.

Según Medina, l’escritor pue buscar un ambiente de disconformidá col mundu que lu arrodía buscando calces que pongan n’entredicho la cultura dominantes, “produzse un conflictu ente individual y coleutivu, ente lo que somos y los cánones de lo que mos faen ser”.

Asina, la homosexualidá conviértse nuna seña de la marxinación social nun de los rasgos d’ún de los pocos personaxes lliterarios gai de la lliteratura asturiana moderna; Xabel Peña, el detective que creó Adolfo Camilo Díaz, qu’apaez por primer vez nel cuentu ‘Una flor de besu’, onde un mozu escuende la so sexualidá por miedu al rechazu.

“Nes sucesives entregues del personaxe, convertíu yá nel detective Xabel Peña, la homosexualidá sedrá una de les notes novedoses como personaxe marxinal que correspuende col clixé tradicional del xéneru, sicasí, les señes de marxinalida camueden con respeutu a los detectives tradicionales”, solliña Medina.

L’autor fala d’una evolución del personaxe y l’aceptación de la so condición: “en ‘Mienteme: dime la verdá’ Xabel Peña acaba d’aceptar la so homosexualidá, contraponse cola figura del xuez Adrián Vega, col que mantién rellaciones y que prefier siguir dientro de la hipocresia social”.

Pablo Rodríguez Medina afirma qu’un de los testos onde más a les clares podemos observar l’usu de la estratexa narrativa de la homosexualidá ye na novela ‘El paraisu blancu’ de Xulio Vixil. Nun de los capítulos, un pá lleva’l so fíu a un puticlú pa que escueya ente les moces pa convertila na so muyer, como’l so pá yá fixere.

Sicasí, frayando con un métodu d’averamientu sexual iniciáticu mui avezao na cultura tradicional, el fíu del protagonista escueye a otro home y el pá tien qu’aceptalo porque xurare aceutar la persona que’l so fíu quixera.

“El desenllaz pon enriba la mesa la hipocresia social: ¿nun ye cuestionable’l mou utilizáu pa escoyer muyer ya iniciase? ¿Nun ye meyor almitir la homosexualidá que fadrá a los protagonistas felices y comer perdices?”, diz Medina.

Con too, l’entreguín recuerda qu’en bien d’ocasiones la nuesa lliteratura recueye como la sociedá nun permite una opción sexual diferente a la de la mayoría. Asina, recuerda la novela ‘L’aire de les castañes’, de Vicente García Oliva, que toma como referencia l’asesinatu real d’un gai xixonés del que nun se toparon culpables “o non se quixeron alcontrar”.

“Un mundu enllenu d’hipocresía que persigue y manca a los homosexuales, prefier dexar llibre a los asesinos, entorpeciendo la investigación. Los intereses particulares, la cobicia de poder atapecen los ideales de xusticia qu’un cargu políticu debería tener”, señala.

Medina fala tamién d’un tratamientu de la homosexualidá como la gueta del camín de la verdá y l’autorrealización, destacando dalgunos escritos de Xabiero Cayarga y la novela ‘El boleru de Xabel’: “El protagonista ye un estudiante asturianu n’Inglaterra que busca’l so llugar nel mundu y reflexona sobre lo que ye ser asturianu dende la distancia, esplotando les rellaciones homosexuales como un sentimientu de lliberación”.

En ‘L’arume l’escaezu’ de Fonsu Velázquez, la homosexualidá representa la ruptura cola cultura tradicional, “na obra se nos presenta la relación d’un grupu de xente en Madrid. Ente ellos, la relación de dos homes apicalba nunes escenes d’erotismu crudu bien cercanu a la pornografía”.

Pablo Rodríguez Medina indica que la homosexualidá ye nesti relatu, un indicador del puntu de ruptura cola cultura tradicional de la que se províen, nel momentu en que’l protagonista güel unes flores y alcuerdase d’un episodiu sucedíu na Asturies tradicional del occidente.

“Esceutuando quiciabes la narración de Xulio Vixil, nun convién escaecer que l’ámbitu nel que se desendolquen toos estos testos ye siempre la ciudá, recuerda Medina. “La ciudá, la urbe bíblica, ye vista siempre como’l marcu afayadizu pal espoxigue del petite individual; ye más fácil llegar a ser y realizase plenamente como lo qu’ún quier ser nuna ciudá onde lo colectivo, la cultura dominante nun ye un condicionantes que pese como una llábana enriba de nosotros”, apunta pa finar.