Areces apuesta en Chipre por buscar una alternativa al PIB

Areces presenta güei na Comisión de Mediu Ambiente y Enerxía, en Chipre, un dictame pa definir una alternativa al PIB como indicador esclusivu de crecimientu económicu y riqueza.

Fuentes del Principáu informaron a Europa Press que según esti informe, que se va debatir n'ochobre nel Plenariu del Comité de les Rexones, el PIB "nun mide adecuadamente la calidá de vida", dao que "actividaes que perxudiquen gravemente'l bienestar", como los crímes, los enfrentamientos bélicos y hasta los divorcios, puen facer crecer l'indicador.

Por ello, Areces, que presidió l'Arcu Atlánticu y la delegación española del CdR, va apostar por nuevos indicadores que tengan en cuenta esternalidaes como la degradación del mediu ambiente asociáu al crecimientu económica, la seguridá, la inclusión y el bienestar social.
  
Al so xuiciu, la nueva metodoloxía va ser clave pa diseñar una política europea d'acordies coles prioridaes de la Estratexa 2020 de la UE, que prima oxetivos como'l conocimientu, la intelixencia, la investigación y el diseñu d'un modelu enerxéticu que nun agrave'l cambiu climáticu.
  
El xefe del Executivu asturianu defende amás que los nuevos indicadores tendríen de tenese en cuenta pa escoyer el métodu de clasificación de les rexones de cara al nuevu marcu de perspectives financieres de la Unión Europea a partir del 2013."En plenu contestu de crisis nun va ser fácil dexar al marxe'l PIB, pero sí pue reducise'l so pesu pa nun treslladar una visión distorsionada de la realidá", caltién.
  
El presidente asturianu recibió en febreru l'encargu d'ellaborar el dictame, coincidiendo cola renovación de los cargos del CdR y la constitución de les distintes comisiones de trabayu qu'integren el Comité.
  
Pa la ellaboración del trabayu, Álvarez Areces, matemáticu y estadísticu d'oficiu, reunióse ente los meses d'abril y mayu con dellos espertos na materia, como'l director del Institutu Nacional d'Estadística d'Italia, Enrico Giovannini; l'investigador del Observatoriu francés de Contestu Económicu, Jacques Le Cacheux; la embaxadora d'España na OCDE, Cristina Narbona, y la directora d'Estadística del Organismu, Martine Durand.
  
Antes que les conclusiones del dictame se treslladen al restu d'instituciones europees, van tener qu'algamar el mayor apoyu posible en Chipre y l'aprobación n'ochobre del Plenu del Comité. Pal Gobiernu del Principáu, de fructificar, "el dictame pue marcar un antes y un dempués na política europea".