Yoni y yo de Pablo X. Suárez va presentase na FNAC

El próximu vienres 2 de xunu, la FNAC de Parque Principáu va acoyer la presentación de ‘Yoni y yo’ de Pablo X. Suárez, cola presencia del propiu autor y Adolfo Camilo Díaz.

‘Yoni y Yo’ ta dividíu en dos partes, la primera ta protagonizada poles (des)ventures de Yoni, una suerte de macarrilla de villa.  La segunda parte, narrada en primera persona ye una falsa autobiografía de les viviencies y les zunes del autor.
 
“Yoni y yo ye un llibru sorprendente que reflexa l'estilu descaráu y directu de Pablo X. Suárez, un autor que ta llamáu a ser ún de los futuros referentes de la lliteratura asturiana”, indiquen dende la editorial. L’actu va entamar a les 19.30 hores.
 
Pablo X. Suárez (Samartín d'Anes, Siero, 1981) ye llicenciáu en filoloxía hispánica pola Universidá d'Uviéu y escritor n'asturianu. En poesía tien asoleyáu ‘Asturiana Beat’ cola editorial Trabe y en narración tien dellos premios na creación de cuentos como nel Concursu de Cuentos pola Oficialidá que convoca'l Conceyu de Bimenes. Tamién tien collaborao en revistes asturianes como Lletres Asturianes, Entellunu o Formientu.