Les FARC anuncien la radicalización de la llucha política

Les FARC anunciaron la "radicalización de la llucha política tres el trunfu ilexítimu" de Juan Manuel Santos nes eleiciones, nes qu'esta guerrilla asegura qu'hubo "fraude y corrupción".

"Col trunfu ilexítimu del continuismu, refugáu pola astención ciudadana, el país entró nun procesu de radicalización de la llucha política, nel que'l pueblu va ser protagonista de primer llinia", señalen los rebeldes nun comunicáu colgáu esti xueves na web de Anncol.

La guerrilla acusa a Santos de ser el ministru de Defensa que "más incrementó los crimes de lesa humanidá" como la impunidá y los llamaos falsos positivos, polos que l'Exércitu viose involucráu núnde los peores escándalos de la so historia al contar como baxes en combate civiles executaos intencionalmente por soldaos.
  
Nesti sen, vuelve criticar la política de seguridá democrática que punxo en marcha l'actual mandatariu, Álvaro Uribe, porque con ella lo que fizo ye "mentir sobre'l fin" de les FARC. "El so gobiernu va pasar a la historia como'l más vergonzosu de les últimes décades, el más asesín de la so población civil, el más arrodilláu a la política de los Estados Uníos, y por esta circunstancia, el más compulsivu provocador d'inestabilidá nes relaciones colos países vecinos", señala'l testu.
  
Momentos dempués de proclamase la so victoria, Santos ratificó la so intención de siguir coles polítiques d'Uribe y, n'especial, con esta cuestionada estratexa de seguridá que foi tanto allabada como criticada dientro y fuera de Colombia, al tiempu que llanzó una dura alvertencia a los grupos rebeldes a los que va combatir si nun dexen les armes y lliberen a los secuestraos.
  
"Mientres estos ocho años gobernó la mentira y la falsedá, la manipulación y l'engañu. Uribe y el continuismu ficieron creer que la so política de seguridá yera de toos, cuando en realidá namás aseguraba, pente medies de la represión, les ganancies de privilexaos sectores inversionistes, qu'aumentaron el desempléu y la probitú", denuncien les FARC.
  
Nos últimos años, l'Exércitu colombianu dio duros golpes a los rebeldes n'operativos que tuvieron encabezaos por Santos como titular de Defensa. Ente ellos figuren la muerte del 'ex númberu dos' de les FARC Raúl Reyes en marzu del 2008; y el rescate de 15 secuestraos, ente los que taba la ex candidata presidencial Ingrid Betancourt en xunetu del 2008 nel marcu de la 'Operación Jaque'.