Los científicos detecten la mediterrización de los Picos d'Europa

El catedráticu d'Ecoloxía de la Universidá d'Uviéu, José Ramón Obeso, dixo que tán detectando cambios pol efeutu del cambiu climáticu, con la mediterranización de los Picos d'Europa.

Asina, faló de la presencia d'aves migratories o vexetación típicamente mediterránea nel parque natural de Picos d'Europa, o la subida altitudinal de les llendes del monte. Tamién hai especies d'abeyón o camparines qu'habiten agora a más altitú pol aumentu de la temperatura.
  
Asina lo fixo mientres la presentación nel Xardín Botánicu de Xixón del Proyectu Cambiu Global nel Parque Nacional de los Picos d'Europa, del que ye l'investigador principal, y pol que s'asitiaron les bases de siguimientu de los cambios na flora y la vexetación debíos al citáu cambiu climáticu. Na presentación tuvo acompañáu de la conceyala de Mediu Ambiente, Dulce Gallego, y del director del Área de Proyectos de la Fundación Diversidá.
  
Obeso esplicó que cada vez ye más común ver especies de carácter mediterraneu nos Picos d'Europa pero tamién que la migración de les aves se produza en feches distintes a les habituales. Sicasí, alvirtió de que nun se trata de datos sistemáticos. Según él, los efectos pol cambiu climáticu más importantes van notase hacia l'añu 2070, anque añadió que pa que puean constatase constataos precísase d'información actual.
  
Según él, los insectos son los más vulnerables al cambiu de temperatures, pero indicó que se dispón de poca información sobre éstos, mientres qu'hai muncho sobre la vexetación que pue aprovechase.
  
Coles mesmes, señaló que'l proyeutu d'investigación foi posible gracies, en gran parte, a les ocho estaciones meteorolóxiques instalaes nos Picos d'Europa, a les imaxes satélite y a la cartografía de la vexetación existente.
  
A partir de la información algamada, va estudiase la espansión de zones arbórees a mayor altitú, lo que se denomina llenda del monte. Nesti sen, indicó que de la comparanza ente la imaxe de 1957 y 2007 nun s'aprecia una variación bien notable, anque sí árees con una espansión de la cobertoria arbórea, cerca de Bulnes, pero que nun tien que ver col cambiu climáticu.
  
Tamién se sentaron les bases de los cambios fenolóxicos, esto ye, de les feches nes que davezu se repiten procesos na vexetación o migren les aves. Esto fíxose al traviés d'imaxe satélite dende l'añu 2000, yá que se precisaba una resolución "bien fina", y hasta l'actualidá en periodos quincenales, pa fixar una llinia base pal siguimientu de l'actividá de la vexetación nel futuru, anque los cambios van ser más rápidos na flora.
  
Amás, marcáronse seis parceles en seis sitios distintos nes que se fixo un croquis de toles plantes, de forma que puea llevase un control periódicu a los cuatro o cinco años y a los diez. Nestes parceles instaláronse termómetros soterraos, a los que se deben cambiar les bateríes cada cuatro o cinco años.
  
No referente a les llendes del monte, la comparanza coles imaxes de los ortofotomapes, a escala 1:5.000 que se tomen nos vuelos que se realicen cada dos años, va permitir comprobar la evolución del mesmu, anque apuntó que va ser necesario discernir si los cambios son pol manexu -como'l tipu de ganadería-- o pol cambiu climáticu.