PSOE rexistra les enmiendes pa llendar l'usu de les llingües nel Senáu

El PSOE materializó'l martes nel rexistru del Senáu les sos enmiendes a la proposición de reforma del Reglamentu pa l'ampliación del usu de les llingües autonómiques na Cámara.

Como avanzara, el PSOE esperó hasta última hora de la tarde del martes pa rexistrar les sos dos condiciones pa que la iniciativa presentada por senadores de tolos grupos parllamentarios, nun siendo los dos mayoritarios, salga alantre.
  
Nes sos enmiendes, a les que tuvo accesu Europa Press, los socialistes reclamen que l'usu de les llingües cooficiales nes sesiones plenaries del Senáu se llende al debate de les mociones y nun puea utilizase mientres la sesión de control al Gobiernu.
  
Amás, propón que la midida empiece a aplicase yá en xineru del 2011, coles mires de poder "reorganizar" el presupuestu de la Cámara'l próximu añu y que la midida nun suponga nengún costu adicional.
  
Pese a que les pretensiones nacionalistes yeren muncho más ambicioses --pretendíen llevar el catalán, l'eusquera, el valencianu y el gallegu a la vida ordinaria de la Cámara Alta--, paez que van almitir esti pasu p'avanzar polo menos d'alguna manera y qu'amás seya nel Plenu del Senáu.
 
Refugu del PP
  
El PP tamién rexistró ayeri trés enmiendes a la propuesta, anque nel so casu coles mires de vaciar de conteníu esta iniciativa a la que s'oponen dafechu. Al so xuiciu, la Constitución dexa claro que l'usu de les llingües cooficiales tien de llendase al ámbitu de la so comunidá autónoma y les sos instituciones.
  
Según defende'l PP, la Cámara Alta representa a tol pueblu español, polo que la so actuación tien de realizase "en términos que facilite la comprensión por tolos españoles". "Y poro, ha desarrollase en castellán", calca antes d'alvertir que, en casu contrariu, taría "privándose a parte del pueblu español de la posibilidá de conocer y entender los términos en que se desarrolle'l debate ente los sos representantes".