Gamesa entama la construcción del Parque Eólicu de Carondio, n'Allande

Gamesa entamó ayeri la construcción del Parque Eólicu de Carondio nel términu municipal d'Allande, desarrolláu  por EDP Renovavéis, el tercer operador mundial d'enerxía eólica.

Esti parque va construyise con un sistema novedosu nel Estáu, treslladando les pales de los aeroxeneradores con helicóptero-grúa, lo que va permitir un impactu medioambiental muncho menor que'l métodu habitual de tresportar les pales en camiones hasta cada aeroxenerador, según los responsables del proyeutu.
  
Les pales van tresportase una a una dende la Campa de Navia, población a 23 kilómetors del parque. L'helicópteru-grúa, diseñáu pal treslláu d'elementos bien pesaos, van pilotalu espertos norteamericanos, según informó Gamesa.
  
Ta previsto acabar el treslláu de les pales en dos fases: la primera dende ayeri y hasta'l 30 de xunu y, la segunda, dende'l 15 al 31 de xunetu. El restu del treslláu de los elementos que componen el parque va realizase pel tresporte habitual terrestre.
  
Los aeroxeneradores instalaos nel parque de Carondio son el modelu G80 de Gamesa, de 2,0 Mega Watios de potencia, contrataos por EDP Renováveis pa la construcción del parque.
 
Gamesa
  
Con más de 15 años d'esperiencia en tecnoloxíes d'enerxíes renovables, principalmente la eólica, Gamesa ye ún de los cabezaleros mundiales nel diseñu, fabricación, instalación y caltenimientu d'aeroxeneradores.
  
Gamesa instaló más de 18.000 Mega Watios eólicos en tol mundu. L'equivalente añal d'esa producción supón más de cuatro millones de tonelaes de petroleu (TEP)/añu y evita la emisión a l'atmósfera d'una cantidá cercana a los 27 millones de tonelaes de CO2/añu.
  
La compañía ye tamién referencia mundial nel mercáu de la promoción, construcción y venta de parques eólicos, con más de 3.500 Mega Watios instalaos y una cartera de 22.000 Mega Watios en parques eólicos, en distintes fases de desarrollu n'Europa, América y Asia.
  
Con una trentena de centros de producción n'Europa, Estados Uníos, China y la India, y una capacidá de producción añal de 4.400 Mega Watios, la compañía cuenta con una plantiya internacional de más de 6.300 persones.