El Senáu afala al Gobiernu a prohibir el 'burka' n'espacios públicos

El Senáu aprobó esti miércoles, con 131 votos a favor, 129 en contra y nenguna astención, la moción presentada pol PP pa pidir al Gobiernu que prohíba'l velu integral n'espacios públicos.

La midida cuntó col apoyu de CiU, que se sumó a última hora a la iniciativa, y a l'ausencia de cuatro senadores na bancada que podríen dar la mayoría al Grupu Socialista, al qu'apoyaben el PNV y la Entesa.  
  
Na tarde del martes, CiU firmó una enmienda de sustitución promovida pol PSOE que recibió l'apoyu de tolos grupos de la Cámara a esceición del PP. Nella encamentábase al Executivu a utilizar l'ordenamientu xurídicu pa "dar una respuesta apropiada" a la cuestión del velu integral y promover la educación, la sensibilización y la relación coles comunidaes musulmanes nesti ámbitu.
  
Sicasí, CiU pactó depués un nuevu testu col Grupu Popular, qu'incluyó les mesmes intenciones d'apostar pola educación y les relaciones coles comunidaes islámiques, pero que nel so últimu puntu pide "que se proceda a regular la prohibición del usu públicu del burka y el niqab n'espacios acontecimientos públicos pa garantizar la igualdá, la llibertá y la seguridá", conforme plantegaben los 'populares' na so moción inicial.