UNA solicita que se tomen midíes de prevención d'inundaciones

El Coordinador d’UNA, Ánxel Díez, considera que los Conceyos nun tán siendo responsables col PXOU, “permitiendo la construcción en zones con posibilidá d’inundación”.

Díez fixo un análisis de dellos datos que se fueron asoleyando la selmana pasa, ente ellos qu’el 70% de les edificaciones inundaes fueron de construcción posterior a 1970. Asina mesmo, considera “interesante”, les declaraciones del presidente de la Confederación Hidrográfica del Norte, Jorge Marquínez, nes que pidía que los conceyos revisaren los sos PXOU pa evitar la urbanización de les zones que s'inundaron la selmana pasada.

"Ye d'una gran irresponsabilidá qu'infraestructures públiques, como ye'l casu significativu del Hospital de Les Arriondes o numberosos institutos y escueles, s'asitien en terrenos que pertenecen históricamente a los cauces fluviales o los sos aliviaderos naturales", anadió Miguel Ánxel Díez.

El coordinador d’UNA tamién fIxo referencia a la planificación de les infraestructures n'Asturies, especialmente de les carreteres "onde l'abaratamientu de los costes d'execución acaba xenerando proyeutos de baxa calidá técnica qu'a la llarga suponen un gastu mui superior al que supondríen si dende'l principiu s'atendiere a criterios de
calidá".

Miguel Ánxel Díez recordó que "son numberoses les carreteres asturianes con argayos, con problemes d'hundimientos, inestabilidá nel firme, o como nel casu d'El Bao de necesaria reconstrucción".

Poro, Unidá Nacionalista Asturiana, considera necesario que'l Gobiernu asturianu y el restu d'alministraciones públiques, tomen nota de les consecuencies que supunxeron a la sociedá asturiana les polítiques que vienen desenvoviendo en materia d'urbanismu y infraestructures, y tomen les midíes necesaries pa que nun futuru nun se volvia repetir.