El presidente del Tribunal de Cuentes denuncia anomalíes

El presidente del Tribunal de Cuentes, Manuel Núñez Pérez, denunció anomalíes na xestión de cuentes y aseguró que "realiza les verificaciones que tien a bien" de los informes.

Mientres el debate nel Senáu del Informe Añal de la Comunidá Autónoma d'Asturies correspondiente al 2004, calcó en que foi precisamente esi añu l'últimu en que'l Tribunal fixo informe, dao que d'esto empezó a encargase depués la Sindicatura de Cuentes del Principáu.

Asina, denunció una serie d'anomalíes na contabilidá y la xestión del sector públicu, como nun tener implantáu un sistema contable adecuáu pal siguimientu y control de cada proyectu d'inversión. Defectos tamién na representación contable y la so xestión, na rindición de cuentes, ausencia d'una contabilidá analítica, presupuestos modificaos sin cobertoria xurídica y caltenimientu de saldu con demasiada antigüedá.
  
Nesta llinia, añadió que los inventarios disponibles -siempre correspondientes al 2004- presentaben defectos na situación patrimonial del Principáu, de manera que nun se permitía conocer la situación de los bienes inmuebles, asina como nel capítulu de les inversiones financieres, sobre les que nun se tuvo información sobre l'estáu de los distintos préstamos concedíos y pendientes de reintegru a les CCAA.
 
Informaciones Incompletes
  
Destacó que l'endeudamientu al llargu plazu del Principáu yera a 31 d'avientu del 2004 un 10 por cientu inferior al del exerciciu precedente, pero denunció que la relación de deudores presupuestarios presentada pola CCAA yera "incompleta y caltenía saldos mui antiguos por importe superior a 20 millones d'euros, algunos d'ellos remontábense al exerciciu 1986, que tendríen que ser oxetu de depuración".
  
Coles mesmes, señaló que'l saldu de deudores presupuestarios a final del exerciciu taba afeutáu por delles salvedaes que "tendríen como efectu una reducción de 107 millones d'euros", al tiempu que resaltó que'l 2004 acabó con 32 años de superávit no qu'a estabilidá presupuestaria se refier.
  
Criticó que la mayor parte de los avales otorgaos presentaben "altu riesgu", que la so cuantía subía a 86 millones d'euros, de los "que trés yeren avales yá vencíos y pendientes de pagu". Amás, añadió qu'había "ausencia de criterios adecuaos na concesión de sovenciones y sobremanera de baremos esplícitos y precisos nos qu'apoyar los criterios".
  
Sobre'l fondu de compensación interterritorial, aseguró que les dotaciones de creitos pa los fondos y "los sos posteriores cambios conseñábense en proyeutos pluriañales nos que nun podía facese un control y siguimientu apropiáu".
  
Tampoco había "una xustificación apropiada" nos espedientes d'obres de carreteres, "na construcción d'un centru directivu, nel suministru de melecines". Según dixo, en toos ellos nun se xustificaba la necesidá de "los fines del contratu pa serviciu públicu", y añadió "qu'esta xustificación yera insuficiente en contratos d'edificación de vivienda de protección pública". Por too ello, encamentó la subsanación de toles "insuficiencias normatives y los defectos comentaos".

Crítiques del PP
  
Per parte del PP, el diputáu Isidro Fernández Rozada, señaló que se presenta nel Informe una lliquidación presupuestaria que tien importante superávit y destácase el descensu del 10 por cientu d'endeudamientu de les CCAA.
  
"Estos datos dan señaldá pol deterioru de la comunidá y del país nos últimos años, asina como por falta de reconocencia de los primeros síntomes cuando yeren yá evidentes, y dempués adopción de midíes equivocaes", plantegó.
  
Preguntó al presidente del Tribunal si tolos defeutos podría dicise que taben arreglaos, y denunció qu'éstes facíen necesario "adoptar midíes frente a comportamientos poco rigorosos nos que prevaleció la desidia o l'interés frente al interés xeneral".
  
Per parte del Grupu Mistu, Francisco Javier Tuñón destacó que la Sindicatura emite los sos informes "más rápido y emitió yá'l del 2008", asina que'l valor d'esti informe del 2004 "llega tarde y toles correcciones vinieron incluyíes nos informes socesivos que se ficieron".
  
La socialista Carmen Sanjurjo faló de "informe de transición" y aseguró que "munches d'estes cuestiones corrixéronse n'exercicios anteriores". Por exemplu, destacó que se dispón d'un inventariu de los bienes inmuebles y muebles en procesu continuu d'actualización.
  
"Meyoróse na correcta definición de pliegos de los concursos, según los requisitos que tienen de cumplir los beneficiaos de sovenciones. Impulsóse la creación d'una base de datos única de sovenciones pa tol Principáu aumentando'l control y evitando duplicidaes. Ésti ye'l compromisu políticu y alministrativu d'Asturies col procesu de meyora continua de la xestión pública", espunxo.