Convoquen el XI Premiu Astragal

La Conseyería de Cultura y Turismu y el Conseyu de la Mocedá de Xixón convoquen la XI edición del Premiu Astragal, dedicáu a proyeutos artísticos y dotáu con dos premios de 4.000 euros.

La convocatoria cuenta cola collaboración del Conceyu de Xixón y el patrociniu de Caxastur, y al premiu pueen presentase artistes o coleutivos d'artistes asturianos o residentes n'Asturies, o descendientes d'asturianos hasta segundu grau, que nun seyan mayores de 35 años.

El premiu ta dedicáu a proyectos artísticos específicos (instalaciones, videoinstalaciones, acciones, intervenciones y otros procesos creativos) que tean realizaos espresamente pa la Sala d'Esposiciones del Centru de Recursos del Conseyu de Mocedá de Xixón y la so interacción cola ciudá en que ta allugada. Ta dotáu con dos premios de cuatro mil euros. El plazu de presentación de los trabayos va tar abiertu hasta'l 9 de xunetu. Les propuestes que resulten escoyíes van ser presentaes na Sala Astragal na temporada 2010-11.

Na edición de 2009 resultaron ganadores los proyectos presentaos por Lucía Rivero y Cristina Ferrández Box, ‘El Perru Románticu’ y ‘Güertos Urbanos’. El Premiu Astragal demostró a lo llargo de los sos diez años d'esistencia la so efeutividá na calidá de les 20 propuestes artístiques premiaes, abriendo tamién una llínea de collaboración con Llaboral Centru d'Arte y Creación Industrial, que'l so primer frutu foi la coproducción de la esposición conmemorativa del décimu aniversariu, ‘Cabina’, y l'edición del catálogu de la mesma.