La directora del Muséu Arqueolóxicu reconoz que "s'incumplió la llei"

La direutora del Muséu Arqueolóxicu, Elisa Collada, reconoció güei na Xunta Xeneral que "nun se cumplió la llei" per parte del director de la escavación de la Campa de Torres (Xixón).

Según dicha llei'l mesmu tendría qu'entregar los informes y la memoria de los descubrimientos nel Muséu Arqueolóxicu, dalgo que nun fizo. Reconoció amás que nel Muséu nun constaba nin inventariu nin acta d'entrega de les 25 caxes de les escavaciones anteriores a 1988 -les referíes a les pieces que nun apaecieron nel sótanu-.
  
La direutora del Muséu Arqueolóxicu d'Asturies compareció güei a pidimientu del PP pa informar sobremanera lo relacionao colos descubrimientos producíos nes escavaciones del parque arqueolóxicu de la Campa Torres. Na so intervención y manifestó que les pieces topaes dientro de caxes nel sótanu tovía tán pendiente d'un estudiu pa valorar l'estáu de les mesmes y dempués de decidir la so ubicación.
  
Reconoció amás que'l llocal nel que se toparon les pieces de les escavaciones "nun yera'l sitiu más afayadizu p'almacenar materiales". Añadió que los almacenes tienen que ser apropiaos afechos con ciertes midíes de temperatura que permitan un caltenimientu correctu y el llugar nel que taben les pieces nun yera "el más apropiáu p'asitiar esos materiales".
  
"Vi caxes mui deterioraes nes que nun s'apreciaba'l conteníu. Asomaba dalguna bolsa pero non el conteníu y dempués enseñáronme'l "zulu" o sótanu al que s'accedía al traviés d'una escalera y que nun taba exentu d'humedá. Supónse que llevaba ocho años ellí y el pesu de los materiales y la humedá provocó l'estáu de les caxes, pero yo nun vi l'estáu de los materiales", esplicó la compareciente.
  
A preguntes del PP indicó que sí-y "sorprendió" qu'ente les caxes apaecíes apaeciere una na que se lleía "Cataluña", anque manifestó que nun pudo comprobar el so conteníu. De la mesma manera, manifestó que "cree recordar qu'había otres dos caxes con restos d'otres escavaciones arqueolóxiques que nun son de la Campa Torres".
  
El diputáu del PP, Alfonso Román López, afirmó que nesti sen "llama l'atención que desapaecieren caxes de los restos d'otres escavaciones". Asina indicó que según los informes nel zulu había caxes con restos de Cataluña y d'escavaciones d'El Rinconín, ente otros.
  
El 'popular' dixo amás que'l so grupu llegó a la conclusión de que falten por depositar nel Muséu restos arqueolóxicos a partir del añu 1988. "¿Nun-y paez raro que mientres diez años nun se depositare nenguna pieza de la escavación nel Muséu arqueolóxicu a pesar de que s'invirtieron casi diez millones nos trabayos?", preguntó Román López.
  
Román López indicó que'l direutor de les escavaciones ye'l que tien el principal papel a la hora de falar de catalogación de los bienes arqueóloxicos y consideró lo asocedío coles pieces de la Campa Torres como "espoliu".
  
Yá nel turnu de fixación de posiciones el diputáu del PP manifestó que la comparecencia de la directora foi bien útil y clarificadora yá que quedó claro que s'incumplió la llei y en diez años nun se presentó nin una sola pieza de les escavaciones, nin catálogu d algún, nin una sola pieza. Asina afirmó que de nun descubrise'l zulu, nun habría nin una sola pieza.
  
"El responsable de les escavaciones saltó la llei y la conseyera, a pesar de saber qu'eso ye asina, vien a la Xunta y diz lo contrario", dixo'l diputáu del PP que se preguntó cuál ye l'interés de la Conseyería pa combayar con esi espoliu. "¿Qué interés tien la conseyera pa tratar de tapar esti asuntu?", preguntóse'l PP qu'anunció que volverá pidir la comparecencia de la conseyera de Cultura pa qu'esclare lo qu'hasta agora nun quiso esclarar.
  
El diputáu del PSOE, Alfonso Rei, manifestó que de la comparecencia de güei constátase que la xestión alministrativa d'estos restos ye asemeyada a les d'otres pieces.
  
Pela so parte el diputáu d'IU-BA-Verdes, Roberto Colunga, indicó que "el patrimoniu arqueolóxicu asturianu ta xestionándose bien mal" y añadió que'l so grupu nun comparte la visión personalista de xestión. "Poco a poco va viéndose lo que pasó coles pieces de la Campa Torres", dixo Colunga, que da la sensación de que p'algunes persones los descubrimientos son más bien una carga.