Areces refuerza con tres alcuerdos la cooperación con China

Areces robló güei con representantes de la República Popular China tres nuevos acuerdos de collaboración pa reforzar la cooperación científicu-tecnolóxica y educativa.

Estos convenios firmáronse en Shanghai, ente la Conseyería d'Industria y Empléu y los departamentos de Ciencia y Tecnoloxía del Gobiernu de Zhejiang; el Centru d'Intercambiu Tecnolóxicu; y el departamentu de personal de la provincia china. El periodu de vixencia ye de cinco años nos tres casos.
  
Los tres convenios contribúin a reforzar tovía más la cooperación internacional, tomando como puntu de partida l'hermanamientu ente la provincia de Zhejiang de la República Popular China y d'Asturies. No referente a los dos acuerdos sobre ciencia y tecnoloxía, impliquen la organización d'actividaes de cooperación y intercambiu pa esplorar nuevos campos de trabayu, métodos innovadores de collaboración internacional y intercambiu de tecnoloxía. Si ye necesario, van compartise recursos intelectuales. Ente algunes de les actividaes previstes, destaquen intercambios académicos y empresariales; la organización de ponencies; la orientación técnica; el desenvolvimientu de proyectos conxuntos; y formación técnica sobre árees y temes d'interés mutuu.
  
Respeuto al conveniu de personal, la representación de Zhejiang recái nel Zhejiang Province Bureau of Foreign Experts. Este ye un departamentu integráu nel Bureau Provincial de Personal, que tien ente les sos funciones l'estudiu de la lexislación p'adautala a la introducción de talentu y espertos estranxeros na provincia, lo mesmo que de xestionar el trabayu del personal estranxeru. Tamién s'encarga de dirixir proyectos d'educación internacional y establecer llazos de cooperación pa intercambiu de talentos con instituciones estranxeres.
  
Según esplicó Areces, estos acuerdos "van contribuyir a una meyor formación de los nuesos mozos y profesionales, asina como a estrechar la cooperación en materia d'investigación y innovación tecnolóxica". "Tamos falando de dos aspectos, los recursos humanos y la innovación, que son decisivos na evolución del nuesu texíu productivu, na modernización y meyora de les nuestres empreses, nel intercambiu d'esperiencies y conocencia pa dar nuevos beneficios y bienestar a les nueses sociedaes", acabó.
  
Preguntáu pola protesta d'algún sindicatu nel Aeropuertu d'Asturies, que criticaron el viaxe institucional, Areces señaló que nun entendía esa actitú porque lo que se pretende con esti tipu d'iniciatives ye precisamente buscar posibilidaes nel mercáu chinu pa qu'esistan efectos positivos que dempués van recayer na economía d'Asturies.
 
Foru negociu
 
Anteriormente, Areces participó nel III Foru de Negocios ente la República Popular China y el Gobiernu del Principáu d'Asturies, celebráu nel Gran Hotel Meliá Shanghai pa fortalecer les oportunidaes comerciales nel país asiáticu.
  
Tamién intervino'l secretariu xeneral de la Federación Asturiana d'Empresarios (FADE) pa destacar que'Asturies pue suponer "una puerta" pa China de cara a entrar nos mercaos europeos y d'América Llatina. Esplicó que "la calidá, l'apuesta pola innovación" y la seriedá nos negocios" son elementos claves n'Asturies, y dixo que pa los empresarios asturianos China ha ser ún de los sos principales oxetivos porque tien "enormes oportunidaes".
  
La xornada trescurrió con distintes meses sectoriales nes que participaron representantes de les 17 empreses asturianes que participen na misión empresarial. Trátase de les empreses Alsa, Asturiana de Laminados, Confeciones Novatex, Duro Felguera, Felguera Melt, Fenil Rail, Friobas Basilio, Fundición Nodular, Grupo Daniel Alonso, Grupo de Empresas Temper, Ibersa-Ibérica de Revestimientos, ITK Ingeniería, Servicios Avanzaos Medioambientales Samesa, Talleres Alegría, Talleres Zitrón, ThyssenKrupp Elevator y Volumetria del Principado.