Santos diz que "llegó la hora de la unidá nacional"

El presidente electu de Colombia, Juan Manuel Santos, afirmó'l domingu nel so primer discursu, tres ganar na segunda vuelta de les eleiciones, que llegó la hora "de la unidá nacional".

"El reló de la historia güei marca una nueva hora. Llegó la hora de la unidá nacional. Llegó la hora de la concordia ente los colombianos, de trabayar xuntos pola prosperidá de Colombia",afirmó'l mandatariu electu, que compareció ante los sos siguidores nel coliséu d'El Campín, en Bogotá, acompañáu pola so muyer, los sos tres fíos y el futuru vicepresidente, Angelino Garzón.

Santos afirmó qu'esi acuerdu d'unidá nacional "que yá ta en marcha", pasa per algamar mayores niveles de calidá democrática, de salú y educación, de prosperidá económica, de seguridá y de llucha contra la corrupción.
  
"Los colombianos votaron p'apoyar un mensaxe d'unidá y yo recuéyolu. A partir d'esti momentu soi'l presidente electu de tolos colombianos, de tolos que m'apoyaron y tamién de los que nun m'apoyaron", afirmó Santos, que dio les gracies a los cerca de nueve millones de persones que votaron pola so formación, el Partido de la U, nes votaciones d'esti domingu.
  
"Gracies pola confianza que depositaron en nosotros nueve millones de ciudadanos. A pesar de l'aguada en tol país, de los partíos de fútbol (en referencia al mundial de Suráfrica), llogramos la mayor votación nunca llograda por un candidatu na nuesa historia. Y recíbolo con humildá y gratitud", afirmó Santos en declaraciones recoyíes pol diariu El Tiempo.
  
El presidente electu tamién tuvo palabres d'alcordanza pal so rival na segunda vuelta, el candidatu del Partido Verde, Antanas Mockus, del que dixo que fuere "un contendiente d'altura".
  
"El profesor Mockus foi un contendiente d'altura que punxo a pensar a Colombia nel valor de la vida, el valor de la tresparencia y de la llegalidá. Usté y yo compartimos eses banderes y convídolu a que xuntos les caltengamos n'alto. Si nel estreldu de la campaña produxeron delles firíes, güei zárren pa siempre", dixo.
  
D'otru llau, Santos tamién emponderó al presidente saliente y principal padrín políticu, Álvaro Uribe, del que dixo que fuere "ún de los meyores mandatarios en 200 años de vida republicana".
  
"Este ye tamién el so trunfu, presidente Uribe. Los colombianos namás tenemos gratitú y reconocencia a la so magnífica obra. Los colombianos votaron güei masivamente p'apoyar un programa de gobiernu que sigue y desarrolla los avances de la so Alministración", acabó.