Sanchéz Vicente: “Nun veo que la xuntanza llegue a dalgún llau"

|

Xuan Xosé Sánchez Vicente (Xixón, 1949) ye un políticu y escritor, presidente y fundador del Partíu Asturianista (PAS). Asturies.com faló con él sobre’l presente y fututu del so partíu.

Va poco’l PAS celebró los sos 25 años. ¿Qué valoración fai d’esti periodu?

Foron años positivos pa la sociedá asturiana, en dalgunos momentos frustrantes pa la militancia y los votantes del PAS. Camiento que fomos nós los qu’instalamos l’asturianismu dientro de la sociedá, mesmamente que PP y PSOE tuvieren un barnizín asturianista, enantes nin siquiera colocaban la bandera asturiana. Influyimos tamién na reforma del Estatutu d’Autonomía, mientres que colos pautos con Sergio Marqués ayudamos a crear una montonera d’infraestuctures, tamién creamos 20.000 emplegos. Dende’l puntu de vista identitariu sacamos la Llei d’Usu, lo únicu que tien l’asturianu y, quiciabes, lo únicu qu’haya en muncho tiempu.

¿Camienta que l’asturianismu foi percríticu col so partíu cuando s’aprobó la Llei d’Usu?

Foi disparatadamente desconocedor de la realidá, por dicilo de dalguna forma suave, la Llei yera lo posible. Mesmamente fomos mui criticaos por proponer la ‘oficialidá diferida’, tresferir del Parllamentu español al asturianu la posibilidá de declarar la oficialidá, recoyéndolo asina nel Estatutu. Esto entendióse como una renuncia a la oficialidá. El PAS foi quien más fixo pol asturianu y a quien más se castigó por ello. Hubo mala voluntá, IU trabayó mui bien mintiendo y por parte del asturianismu hubo falta de voluntá por informase.

¿Ún de los problemes del PAS nun ye la so definición como partíu interclasista?

Dende los años 50 n’Occidente namás qu’hai partíos interclasistes. Podemos mirar pal PSOE, la so ideoloxía ye gobernar, pero tresmiten el discursu de que tán pol pueblu, de que son d’esquierdes. Sicasí, el so discursu nun s’estrema muncho del que puen facer otros partíos.

¿Y el PAS ye más rexonalista o más nacionalista?

Preferimos la pallabra asturianista, precisamente pa evitar esi alderique. A esta pallabra amestamos  ‘de progresu’ ya ‘interclasista’. Ye una definición de la realidá, amás, asina nos estremamos dafechu d’esi mieu que pesa tovía nel asturianismu de que la xente lu asocie a dalgo arcaicu, al costumismu. Lo que nos define ye ser un partíu d’ámbitu asturianista, si se quier nacionalista. Pero nes cuestiones de tipu social o económicu nun tenemos dogmatismos.

¿Y qué opinión tien el so partíu de la nomada ‘xuntanza’ del asturianismu?

Tolo que puea sumar ta mui bien. Yá fiximos esfuercios nel pasáu con otres organizaciones, como Andecha ya IAS. Sobre too, el gran esfuerzu de sumar los dos partíos con más votos, PAS y URAS, n’Unión Asturianista, dalgo que funcionó bien. A esta capacidá d’entendimientu que nós tuvimos tendríen que sumase otres fuerces.

Nin UNA nin Bloque tán pola llabor de dir con UAS. ¿Pal PAS ye fundamental esa collaboración?

URAS pon ún de los alcaldes y dellos conceyales d’Unión Asturianista, hai que partir de la realidá, non de los suaños. URAS ye un partíu tan asturianista como los demás, salen del PP pero tienen una trayeutoría llarga y agora, dientro del proyeutu asturianista, tán aportando un gran númberu de votos.

Con Andecha Astur roblaron un pautu de collaboración. ¿En qué quedó?

Siguimos teniendo contautu con ellos, pero a esi pautu yá se-y pasaron los plazos, paez que nun hai forma d’avanzar. Nós tamos dispuestos a nun zarrar nada siempre que se tenga en cuenta la realidá y se tenga una mínima educación cívica.

¿Y col Bloque o UNA hubo dalgún contautu?

Nun voi dicir con quien pero hubo contautos, mesmamente más que con Andecha Astur. Pero yo creo que too esto nun camina haza nengún llau.

¿Nel casu d’una xuntanza, el PAS aceptaría que vusté nun fora’l candidatu?

Tovía nun sé quién sedrá’l candidatu del PAS, pero hai que partir del principiu realista del que tien más votos ye’l que tien que poner la parte sustancial. Ye un principiu de buena educación, más que de democracia y de soberanía de cada organización. Nun velo asina ye una cuestión de nun ver la realidá.

Según dalgunos, la Coalición Asturiana (PAS-UNA) foi la oportunidá perdida del asturianismu

Nun ye asina. UNA marchó de Coalición Asturiana, que non al revés, y muncha xente d’UNA vino pal PAS, la nuesa organización subió en votos nes siguientes eleiciones, son datos oxetivos. Aquella hestoria foi bien, nun causó nengún problema la frayadura. Lo que pasa que depués vino la coxuntura d’Areces, Marques y Cascos, y por 800 votos quedamos fuera. A partir d’ehí ensin tener perres nin proyeición medíatica ye difícil visualizar el proyeutu.

¿Pa vusté cuál foi’l motivu de que frayara Coalición Asturiana?

Nun me presta andar dando vueltes al pasáu, nun merez la pena. Naquel momentu hubo falta d’entendimientu dientro de la propia UNA, paezme qu’había xente que nun tenía ganes de llegar a alcuerdos. Xente de la UNA pasó p’Andecha, otros pal Bloque, el mesmu Rafa Palacios.

¿Qué resultáu esperen algamar pa les próximes eleiciones?

Ún siempre piensa algamar un bon resultáu porque camienta que’l proyeutu merez la pena y ye lo qu’Asturies necesita. Cuando n’España les coses van bien, n’Asturies van mal y cuando n’España les coses van mal, n’Asturies van peor. Los asturianos van dase cuenta un día que tán dando-yos el votu a xente que-yos roba la cartera, que nun trabayan pa ellos, que trabayen pa los catalanes o los andaluces. La desilusión de los asturianos colos sos políticos pue danos un ésitu curiosín, eso si, hai que tener en cuenta la falta de presencia mediática.

 

Comentarios

Xuntanza pa equi o pa elli , non hai un programa  con alternatives politiques ,cadun cuez el so pote y pensa que, ye el meyor asturianista ,poro son  los de sempre .
Non basta con glayar ,dalgunos con ideyes que non van a dayuri ,espardiendose los votos de forma que,como ye'd  vezu sin deputaos quedamos, sin forza sin perres y porque ??Por que fai falta un lider que, faga un partiu d'Asturies y pa Asturies ,esin fundamentalismos  esin ideyes  que, comparten un garrapiellu ,sin alternativa dalguna .
Asina tamos casi del entamu y non se meyora, unos truñaos con los otros y Asturies por barrer!!

Ún siempre piensa algamar un bon resultáu porque camienta que’l proyeutu merez la pena y ye lo qu’Asturies necesita. Cuando n’España les coses van bien, n’Asturies van mal y cuando n’España les coses van mal, n’Asturies van peor. Los asturianos van dase cuenta un día que tán dando-yos el votu a xente que-yos roba la cartera, que nun trabayan pa ellos, que trabayen pa los catalanes o los andaluces. La desilusión de los asturianos colos sos políticos pue danos un ésitu curiosín, eso si, hai que tener en cuenta la falta de presencia mediática.
642-524 \ HP2-E31 \ PK0-003 \ 199-01 \ 642-533 \ 70-271 \ HH0-110 \ OG0-093 \ 220-702 \ JK0-016 \ JN0-343 \ BH0-010 \ 1z0-050 \ 642-262

Contador Estadistiques