El númberu d'afeutaos pola violencia en Kirguistán sube a un millón

Cerca d'un millón de persones viéronse afeutaes pol brote de violencia nel sur de Kirguistán y precisen alimentos y otros suministros, alvirtió esti vienres el personal de la ONX.

Esta cifra inclúi a los sobre 400.000 qu'escaparon de los combates étnicos nes ciudaes d'Osh y Jalalabad (sur). D'ellos, una cuarta parte llegaron a Uzbekistán y el restu sigue en territoriu kirguís.

"De momentu, pensamos que probablemente vamos precisar responder a les necesidaes de más d'un millón de persones: desplazaos, refuxaos y persones agospiaes en cases de familiares que se vieron afectaes pol conflictu", manifestó la vocera del Fondu de Naciones Xuníes pa la Infancia (UNICEF), Christiane Berthiaume. "Ye una cifra de planificación, podría variar", adelantó.
  
Prevése que'l fondu d'emerxencia de la ONX pida esti a la comunidá internacional más de 65 millones de dólares (más de 52 millones d'euros) p'atender a cerca de 1.100.000 persones mientres seis meses. Amás va pidir otra cantidá pa facese cargu de los refuxaos que llegaron a Uzbekistán.
  
El conflictu tuvo "consecuencies humanitaries graves y urxentes" en Kirguistán, declararon otres fontes de Naciones Xuníes. Dende'l 10 de xunu morrieron polo menos 191 persones nel sur del país de resultes de los enfrentamientos ente uzbekos y kirguises, pese a que la presidenta del Gobiernu interín, Raspia Otunbayeva, piensa que'l númberu de víctimes podría ser diez veces mayor.
  
Mañana l'Altu Comisionáu de Naciones Xuníes pa los Refuxaos (ACNXR) pretende enviar un cotinxente de tiendes de campaña y otros suministros, puesto que 40.000 persones nun alcontraron refuxu de momentu. El Programa Mundial d'Alimentos (PAM) yá ta preparando la distribución d'un total de 150 tonelaes d'alimentos y aspira a entregar tamién 80 tonelaes de barrines enerxétiques.
  
"La situación nel sur de Kirguistán sigue siendo tirante y precaria. Hai continuos informes esporádicos de violencia", señaló'l voceru d'Acnur, Andrej Mahecic. Coles mesmes llamentó que sigue siendo difícil aportar a delles partes d'Osh y a otres zones.
  
El Comité Internacional de Cruz Roxa (CICR) dio parte de dellos tiroteos asocedíos mientres la nueche n'Osh, onde esti va empezar el repartu de comida. El voceru del Comité, Christian Cardon, precisó que la población ta arrequexándose en mezquites, caseríes, pueblos y edificios alministrativos "que quedaron vacíos mientres los enfrentamientos".