El Parllamentu apruba'l calendariu pal proyeutu de llei d'axuste

La Xunta de Voceros de la Xunta Xeneral aprobó'l calendariu pa tramitar el proyeutu de llei de midíes urxentes de contención del gastu y en materia fiscal pa la reducción del déficit.

Asina, el próximu llunes 21 de xunu acaba a les 12.00 hores el plazu pa solicitar comparecencies. Darréu, la Mesa de la Comisión d'Economía y Facienda va señalar les mesmes. Les comparecencies van tener llugar el miércoles 23 de xunu a les 16.00 hores y el xueves 24 de xunu a les 9.00 hores.

El plazu pa la presentación d'enmiendes acaba'l vienres 2 de xunetu a les 13.00 hores. Esi día la Mesa de la Comisión d'Economía y Facienda reúnese pa calificar y almitir a trámite enmiendes a la totalidá si les hubiere. El Plenu del Debate de totalidá tendría llugar el llunes 5 de xunetu.
  
Esi mesmu día la Comisión d'Economía y Facienda va calificar y va almitir enmiendes parciales, amás de designar ponencia. A otru día, martes 6 de xunetu, va reunise la ponencia, mientres que'l miércoles emitiráse'l dictame. El vienres 9 de xunetu va tener llugar el plenu final.