Muerre'l premiu Nobel de Lliteratura José Saramago

El premiu Nobel de Literatura José Saramago morrió esti vienres a los 87 años d'edá na isla de Lanzarote (Canaries), onde vivía dende la década de los 90.

En concreto, Saramago morrió a les 12.30 hores na so casa de Tías, Lanzarote, por mor d'un fallu multiorgánicu depués d'una llarga enfermedá.nL'escritor, según indicó la Fundación que lleva'l so nome nun comunicáu, "morrió acompañáu de la so familia, despidiéndose d'una forma traquila y plácida".

José de Sousa Saramago nació n'Ainhaga (Portugal) el 16 de payares de 1922 nel senu d'una familia llabradora y, en 1924, treslladóse al par de los sos padres y el so hermanu mayor a Lisboa, onde cursó los sos estudios de Primaria y empezó'l ciclu de Bachilleratu.
  
Sicasí, l'autor nun pudo acabar la educación secundaria por mor de les dificultaes económiques de la so familia y, con malpenes 12 años, ingresó nuna escuela d'enseñanza profesional p'aprender l'oficiu de cerraxeru mecánicu. Depués de cinco años de formación, desempeñó esti empléu mientres 24 meses nun garaxe de la capital portuguesa.
  
Mientres el so procesu de formación como cerraxeru, Saramago tuvo la oportunidá d'estudiar Lliteratura, a pesar de que'l cursu educativu taba destináu a preparar profesionales técnicos. Nesta época, empezó a frecuentar una biblioteca pública de Lisboa mientres la nueche. "Y foi asina, sin ayudes nin conseyos, malpenes guiáu pol interés y pola voluntá d'aprender, que'l mio gustu pola llectura desarrollóse y pulió", aseguró l'escritor nuna pequeña autobiografía na páxina 'web' de la so fundación homónima.
  
Gracies a la so educación autodidacta, Saramago púnxose en contactu col mundu de la lliteratura y, en 1947, publicó'l so primer llibru, un romance tituláu 'A Viúva' ('La Vilba', n'asturianu), pero que, "por conveniencies editoriales", publicóse col nome de 'Terra do pecado' ('Tierra del pecáu'). Dempués d'esta obra, escribió la novela 'Clarabóia' ('Claraboya'), qu'a día de güei permanez inédita, y l'empiezu d'otra novela que nunca acabaría. Según l'autor, n'abandonando esti últimu proyeutu, entendió que "nun tenía que dicir nada que valiera la pena", polo qu'abandonó la escritura hasta 1966.
  
Sicasí, Saramago volvió al mundu de la lliteratura a últimos de los 50 depués d'ingresar na editorial 'Estúdios Cor', lo que-y permitió conocer y establecer relaciones d'amistá con algunos de los escritores portugueses más importantes del so tiempu. Coles mesmes, y pa "meyorar el presupuestu familiar", empezó a dedicar parte del so tiempu llibre a trabayos de traducción d'autores como León Tolstoi o Charres Baudelaire.
  
En 1966, l'autor publicó la colección poética 'Os poemas possíveis', depués de casi 20 años alloñáu de la escritura. D'esta manera, Saramago vivió la so etapa de máximu esplendor mientres la madurez y, gracies a títulos como 'Memorial del conventu' (1982) o 'Ensayu sobre la ceguera' (1995), fíxose un güecu ente los meyores novelistes contemporaneos.

En 1971, abandonó la editorial y ingresó nel mundu del periodismu como responsable del suplementu cultural del 'Diário de Lisboa' p'acabar trabayando, cuatro año más tarde, como direutor adxuntu del 'Diário de Notícias'. Despidiéronlu siete meses dempués por motivos políticos y, a partir d'esi momentu, dedicóse por entero a la lliteratura.
  
"Ensin empléu una vez más, sopesaes les circunstancies de la situación política en qu'entós se vivía [la dictadura de Salazar] y sin posibilidá d'atopar trabayu, tomé la decisión de que me dedicaría dafechu a la lliteratura: yá yera hora de saber lo que podría valir como escritor", aseguró Saramago, qu'en 1980 publicó la novela 'Llevantáu del Suelu', la obra que marcó'l so estilu lliterariu, una aproximación orixinal a la fantasía perfilada, ente otres coses, pol so empléu característicu de los signos de puntuación.
 
Lo fantástico y lo alegórico

Según l'escritor y semiólogu Umberto Eco, que prologó la edición italiana de l'antoloxía de Saramago 'El Cuadernu' (2009), l'autor portugués cuidaba la puntuación "hasta l'estremu de facer" que desapaeciere y, na so crítica moral y social, nun encaraba "los problemes de frente" sinón que los arrodiaba "baxo les formes de lo fantástico y lo alegórico". "Saramago fai que'l llector viaxe nuna borrina láctea na que nin siquier los nomes propios dan una señal claramente reconocible", añadió'l catedráticu italianu.
  
Dos años depués de publicar 'L'Evanxeliu según Xesucristo' (1991), censuráu en Portugal pola so crítica frontal a la relixón católica, Saramago movióse a la isla canaria de Lanzarote. Según l'autor portugués, el Gobiernu del so país vetó la presentación del llibru al Premiu Lliterariu Européu y, por ello, decidió cambiar de residencia xunto a la so segunda esposa, la periodista española Pilar del Río, con la que se casó en 1988.
  
Mientres la so estancia n'España, publicó dos de les sos noveles más populares 'Ensayu sobre la ceguera' (1995) y 'Tolos nomes' (1997) y, en 1998, conquistó'l Premiu Nobel de Lliteratura gracies al so estilu llimpiu y cercanu a la prosa poética. "Sentí una emoción bien fuerte y, como asocede casi siempres con toles emociones fuertes, ún nun s'entera; sufrir, siéntelo, pero verdaderamente nun s'entera, y ye col pasu del tiempu cuando ún da cuenta de lo qu'asocedió", aseguró dempués de conocer la noticia.

N'activo hasta'l final
  
Nos últimos años de la so vida, siguió publicando noveles y obres autobiográfiques con avezamientu y, nesta etapa, destaquen títulos como 'L'home dobláu' (2002), 'Ensayu sobre la llucidez' (2004), 'Intermitencies de la muerte' (2005) o 'El viaxe del elefante' (2009). Coles mesmes, dende setiembre del 2008, l'autor cultivó l'ensayu de carácter cultural, políticu y social na so bitácora dixital 'caderno.josesaramago.org', onde desarrolló un estilu duru y directu que contrasta col restu de la so narrativa.
  
"Antonio Machado escribió aquello de 'Caminante, no hay camino, se hace camino al andar'. Y ye lo que tamos intentando: andar y facer camín, facer camín y andar. La xornada va ser llarga, pero nun mos vamos desanimar. Cada día vamos llegar, cada día vamos partir. Más allá, siempre más allá", destacó l'escritor na páxina 'web' de la so fundación, cola vista puesta, probablemente, nesti día en que la so obra sobrevive-y lu busca.
  
El Nobel de Lliteratura anunció'l pasáu mes de payares na presentación del so últimu llibru, 'Caín', que yá taba escribiendo la so próxima obra, que tenía como tema central la industria del armamentu. Quién fabrica les armes, quién trafica con elles y quién muerre son temes d'esi testu. Nesti momentu, "la vida humana nun tien nenguna importancia", dixo l'autor entós.