La deuda nel primer trimestre del añu asítiase en 1.077 millones

La deuda d'Asturies quedó nel primer trimestre del añu en 1.077 millones d'euros, la tercera más baxa d'España, tres La Rioxa y Cantabria, lo que representa'l 4,4% del so PIB.

A nivel nacional la deuda de les comunidaes autónomes aumentó un 28,4 por cientu nel primer trimestre del añu en comparanza col mesmu igual periodu del 2009, hasta rexistrar 94.621 millones d'euros (el 9 por cientu del PIB), la cifra más alta de tola serie hestórica..
  
Los datos del Bancu d'España muestren amás que dende l'añu 1995, l'endeudamientu de les rexones nun paró de crecer, batiendo en cada exerciciu récores históricos, a pesar del compromisu d'estabilidá presupuestaria garráu nos últimos años.
  
La comunidá autónoma con mayor volume de deuda nel primer trimestre foi otra vuelta Cataluña, con 25.079 millones d'euros, cantidá que representa'l 26,5 por cientu del total de la deuda acumulada nel conxuntu de les comunidaes.
  
Depués de Cataluña, asitióse Valencia (15.356 millones d'euros), que vuelve ocupar el segundu llugar per delantre de Madrid, onde la deuda subió a 11.712 millones d'euros. Ente los trés, acumulen el 55,1 por cientu del total del endeudamientu rexonal.
  
De siguío, figuren Andalucía (10.788 millones d'euros), Galicia (5.244 millones), Castiella-La Mancha (4.155 millones), Baleares (3.546 millones), Canaries (3.483 millones), País Vascu (3.317 millones), Castiella y Lleón (3.141 millones d'euros), Aragón (2.234 millones), y Murcia (1.687 millones).
  
Completen la llista Navarra (1.495 millones), Estremadura (1.085 millones), Asturies (1.077 millones), La Rioxa (627 millones) y Cantabria (595 millones).
  
No referente a la evolución de la deuda, nenguna comunidá autónoma llogró amenorgar el so endeudamientu sobre'l pasáu añu, destacando la subida del 103 por cientu nel casu de Canaries, el 73,6 por cientu de Navarra o'l 58,2 por cientu de Murcia.