Illas acueye la 'IV Feria del Branu'

La Mancomunidá Comarca Avilés pon en marcha la 'Cuarta Feria del Branu n'Illas', que va desenvolvese mientres los díes 19 y 20 de xunu en La Caizuela, capital del conceyu d’Illas.

Esta Feria va ser inaugurada mañana sábadu a les 12.00 hores pol Presidente de la Mancomunidá Comarca Avilés y Alcalde d'Illas, Alberto Tirador, y a dicha inauguración tán convidaos el restu d'Alcaldes y Alcaldeses de la contorna, asina como la Dirección Xeneral de Turismu y Patrimoniu Cultural del Principáu, conceyales que representen a les distintes corporaciones na Xunta de la Mancomunidá, y representantes de les organizaciones sociu económiques FADE, UCAYC, Cámara de Comerciu, UXT y CCOO.

Mientres los dos díes de duración de la Feria podrá esfrutase d'un Mercáu Tradicional asturianu nel que va haber embutíos, repostería, sidra, llicores, quesu La Peral, cerámica, goxos, madera, cueru, alfarería, y otros productos como una esposición de motivos etnográficos.

Xuntu col tradicional Mercáu, va haber actividaes como xuegos tradicionales asturianos, música y bailles tradicionales, talleres, amueses costumbristes, xuegos infantiles y acciones d'animación de cai. Amás tamién va haber actuaciones de los grupos 'Escontral Raigañu', la bandina 'El KoKu la mazana'; espectáculu de maxa, clown y malabarismu de Mister Tacho, Trío Santos, Caleya y Varela, grupu de baille La Peral, pa cerrar  el domingu con una Danza Prima.

La Cuarta Feria del Branu n'Illas va tar abierta'l sábadu ente les 11.30 y les 14.30 hores, y ente les 16.30 y les 23.00 hores; y el domingu va tar abierta de 12.00 a 20.30 hores.