Avilés entama’l so IV Concursu de micro-rellatos ‘L’Horru’

Con motivu de les Fiestes del Carbayedo (Avilés), l’Asociación de Vecinos El Hórreo, en collaboración cola Estaya de la Llingua, entama’l IV Concursu de micro-rellatos n’asturianu.

A esti concursu pue participar cualesquier escritor en llingua asturiana como muncho con tres rellatos, que nun puen pasar de les 500 pallabres y cuya temática ye llibre. El plazu pa presentalos piésllase a les 14 hores del día 2 d’agostu.

La presentación namás pue facese pel corréu elletrónicu, unviando los rellatos en formatu ‘Word’ a: avvelhorreo@yahoo.es. Los trabayos tienen de dir encabezaos per un títulu y firmaos con un nomatu. Les señes del mail nun puen ser indicatives de l’autoría. El xuráu reclamará depués, tamién por mail, tolos datos a los autores finalistes.

El 5 d’agostu un xuráu formáu por reconocíes personalidaes de la cultura asturiana determinará los trabayos ganadores. El llunes, 23 d’agostu, los cuentos premiaos va lleelos un contador avezáu o contadora, o polos mesmos autores, nel prau la fiesta (parque del Carbayedo), a les 20:00 hores. A esi actu han asistir los ganadores, pa recoyer los premios.
          
Tolos rellatos presentaos, premiaos o non, van asoleyase nuna esposición al aire llibre, nel prau la fiesta, abierta al públicu los díes que dure ésta. Daráse un primer premiu de 400 € y troféu al meyor rellatu y 3 accesits, consistentes en llotes de llibros  y placa, a los otros 3 rellatos finalistes.