Conceyos d'Aragón van presentar un recursu d'inconstitucionalidá

Once conceyos aragoneses van presentar mañana un recursu d'inconstitucionalidá contra la Llei de Llingües por entender que tán invadiéndose competencies municipales.

Nestos once conceyos concéntrase'l 50 por cientu de la población afeutada pola implantación d'esta Llei, según informaron dende'l Partíu Popular (PP) nuna nota prensa.
  
Va ser mañana, vienres 18 de xunu, a les 12.00 hores, cuando Ángel Escolano, abogáu de los conceyos implicaos, presente'l recursu na sede del Tribunal Constitucional en Madrid. Escolano va dir acompañáu pol presidente de la Federación d'Asociaciones Culturales del Aragón Oriental (FACAO), Raúl Vallés, y pol vicesecretariu xeneral de Política Institucional del PP d'Aragón, Manuel Blasco.
  
La presentación d'esti recursu ye consecuencia de la campaña que nel so día entamó'l Partíu Popular, cola finalidá de protexer les llingües y modalidaes llingüístiques propies d'Aragón, asina como'l fomentu del so usu como elementos vivos del nuesu patrimoniu cultural.
  
De los once conceyos que presenten el recursu 8 son del Partíu Popular (PP) y 3 del Partíu Aragonés (PAR), que quiso d'esta manera sumase a esta iniciativa, a favor de la protección de les modalidaes llingüístiques aragoneses, y en contra de la imposición del catalán.
  
Los conceyos del PP que van presentar el recursu son Fayón y Nonaspe, na provincia de Zaragoza, Fraga y Lascarrues, en Güesca, y Valderrobres, La Fresneda, Torre del Compte y Fórnoles, na provincia de Teruel. Per parte del PAR, Aguaviva, La Ginebrosa y La Codoñera, los trés de la provincia de Teruel. Nel casu de La Codoñera, la presentación del recursu contó col apoyu del PSOE.