Los alumnos asturianos son los primeros en competencia llingüística

Los alumnos asturianos de primaria son los que más competencia llingüística tienen de tol Estáu. Amás, son los terceros que meyores aptitúes muestren en matemátiques.

Son les resultaos de la Evaluación Xeneral de Diagnósticu realizada en centros educativos de toa España mientres el cursu 2008-2009, que güei ofreció en rueda prensa'l conseyeru d'Educación, José Luis Iglesias Riopedre. El responsable autonómicu destacó qu'Asturies s'atopa a la cabeza d'España nos cuatro competencies analizaes.
  
Fíxose una prueba xeneral muestral en toles comunidaes autónomes ente l'alumnáu de 4º de Primaria, el so profesoráu, direcciones de los centros escolares y les families d'esti alumnáu. El tamañu de la muestra n'Asturies foi de 1.484 alumnos, 1.442 families, 72 profesores y 50 direcciones de los centros analizaos. Nel conxuntu d'España analizáronse 28.700 alumnos.
  
Los resultaos demostraron que los alumnos asturianos ocupen el primer puestu en competencia llingüística, el terceru en competencia matemática, y el segundu en conocencia y interacción del mundu físicu, y en competencia social y ciudadana.
  
En caúna de les competencies establecen cinco niveles de rendimientu. Nos niveles superiores, según comentó'l conseyeru, "tenemos porcentaxes d'alumnáu significativamente altos y significativamente baxos nos niveles inferiores".
  
Asina, nos porcentaxes superiores, Asturies ta penriba de la media española nes cuatro competencies, destacando por exemplu en conocimientu y interacción física, con 16 puntos de diferencia (43,73 frente a 27,57) o comunicación llingüística, con 13 puntos. Nel casu de los niveles inferiores, Asturies asítiase aprosimadamente a la metá de los porcentaxes de la media española, destacando tamién en conocimientu del mundu físicu, con un 7,81%, frente al 16,79% del xeneral estatal.
  
En pallabres del conseyeru, estos datos referentes a primaria son coherentes cola situación posterior en secundaria y na Universidá. Asina, señaló datos del contestu educativu asturianu: l'alumnáu que repite cursu en 4º de Primaria ta en 4,3, lixeramente perbaxo de la media española (4,5) y los que repiten en 6º son el 5,3 frente a la media española de 6,2. La tasa bruta de graduaos en Secundaria supera'l 85%. En Bachilleratu, 81%, y en FP, 85%.
  
Riopedre esplicó estos resultaos basándose en "les altes espectatives familiares sobre los estudios de los fíos", "l'importante trabayu colaborativu ente profesores, alumnos y families", los programes d'apoyu d'atención a la diversidá y la inversión educativa. Nesti últimu apartáu, reseñó que'l costu por alumnu n'Asturies ye de 7.742 euros, namás perbaxo del País Vascu, y que la ratio de profesores por alumnos ye de 8,1 na comunidá, penriba tamién de la media española.
  
Ente otros datos d'interés sobre'l contestu educativu, recordó que'l porcentaxe d'escolarización d'alumnos ente 16 y 17 años ye de los más altos, con un 80% y que la escolarización del alumnáu estranxeru ta perbaxo de la metá de la media española, con 5,6% frente al 11,3% estatal.