El Conseyu de Ministros va aprobar ayudes específiques

Elena Espinosa afirmó que la próxima xunta del Conseyu de Ministros va valir p'aprobar ayudes específiques pa les zones afeutaes. Mientres, el 112 yá desactivó’l PLANINPA.

La ministra de Mediu Ambiente y Mediu Rural y Marín realizó estes manifestaciones en rueda prensa mientres la so visita a les zones mas afectaes pol temporal nel Principáu, como los conceyos de Gozón, Les Arriondes, Pravia y A Veiga. Tuvo acompañada pol presidente del Principáu, Vicente Álvarez Areces, el delegáu del Gobiernu, Antonio Trevín, la Conseyera de Presidencia, Xusticia y Igualdá, María José Ramos; la Vocera del Gobiernu y Conseyera d'Alministraciones Públiques, Ana Rosa Migoya;  el Conseyeru de Mediu Ambiente, Infraestructures y Ordenación del Territoriu, Francisco González Buendía; y la Viceconseyera de Seguridá, Teresa Ordiz.
  
La ministra, que tuvo acompañada na citada rueda prensa, pol alcalde de Les Arriondes, Manuel Millán García y pol presidente del Principáu, Vicente Álvarez Areces, comentó que ye "imposible" a día de güei cuantificar a cuánto va subir el volume económicu de les ayudes.
  
Asina, dixo que lo que se va articular son ayudes pa les infraestructures estropiaes, per un sitiu, y sovenciones pa emerxencies, pol otru. Nun va ser hasta'l final del procesu, cuando se conoza'l númberu de solicitúes, cuando puea establecese'l total económicu.
  
Dende'l Gobiernu d'España van enviase a Asturies más medios pa intentar normalizar la situación y realizar los llabores de llimpieza, una vez que les condiciones meteorolóxiques meyoraren. Ello ye que la ministra comentó que güei güei mesmu incorporaránse a los llabores de normalización n'Asturies 40 trabayadores de la empresa publica Tracsa.
  
Preguntada sobre si'l diseñu de determinaes infraestructures pudieron tener dalgo que ver nes consecuencies de les riaes, la ministra apoyóse nunos gráficos de la Confederación Hidrográfica del Cantábricu qu'indiquen picos bien penriba del máximu del nivel de los calces de los ríos. "Esto ye la naturaleza", señaló.
  
Sicasí, comentó qu'existen determinaes obres que se realizaron hai años, cuando nun se teníen los conocimientos d'agora. Punxo l'exemplu de Gozón, onde una ponte privada d'una urbanización taponó l'agua y acabó xenerando una gran riada. Asina, pidió comprensión pa les alministraciones que nieguen llicencies de construcción nel actual momentu. "Si lo faen ye porque sí que se preven los riesgos", apuntó.
  
En relación a les posibles consecuencies pal sector turísticu asturianu, la ministra faló d'actuaciones "de choque" en distintes playes afectaes. D'esta manera, van dexase pa depués del branu les obres que precisen un mayor trabayu. Pa los turistes, comentó, ye más molestu una máquina trabayando qu'una zona llendada. Pero aseguró que se van poner tolos medios.
  
Tres la so visita a Asturies, Espinosa va visitar esti xueves les zones afeutaes poles intenses agües rexistraes nos últimos díes na Costa de Lugo. Elena Espinosa, que va tar acompañada pol Delegáu del Gobiernu en Galicia, Antón Louro, va desplazase a Cervo y Burela, calteniendo nesta última población una xunta colos alcaldes de conceyos afeutaos.

Pela so parte, el presidente del Principáu d'Asturies, Vicente Álvarez Areces, destacó la circunstancia de que na zona oriental nun hubiere víctimes que llamentar poles riaes. Comprometióse a trabayar de forma coordinada coles distintes alministraciones. De fechu señaló qu'en Les Arriondes habilitaráse un dispositivu coordináu nel Conceyu, igual que se va facer n'otros conceyos. El Principáu comprométese asina al usu de maquinaria y habilitación de servicios pa llimpieza mecanizada de cases. Tamién va trabayar nel agospiu de persones afeutaes.
  
A lo llargo d'estos díes, esplicó, hubo que rescatar a 174 persones, realizar centenares de desagospios y más de 300 depuradores resultaron afeutaes. Areces encargóse d'ofrecer esos datos, igual que señaló que permanecen cortaes más de diez carreteres. El dirixente asturianu quiso estimar el trabayu desarrolláu polos efeutivos públicos que tán trabayando estos díes y señaló que son munchos los que renunciaron hasta a les sos vacaciones o a los sos permisos.
  
Mientres, l'alcalde de Parres, Manuel Millán, dixo qu'a pesar de les circunstancies nel Conceyu siempre se sintieron "acompañaos" y "tranquilos". Amás, valoró la "solidaridá" que mostraron los vecinos, al ayudar mutuamente nes difíciles situaciones xeneraes pola riada.

La Entidá Pública "112 Asturies" desactivó, a les   17:57 hores, el Plan de Llenes d’Asturies (PLANINPA), que s'atopaba en situación 0. La desactivación vien tres solucionase la mayor parte de les emerxencies rexistraes y comprobar que los calces fluviales nel territoriu del país tán algamando yá niveles de normalidá

Asturies vuelve a la normalidá

Esta mañana yá se pasara a situación 1, lo qu'implicaba que toles  emerxencies entá rexistraes nel nuesu territoriu podíen yá ser atendíes colos medios y recursos disponibles de la Comunidá Autónoma.

Los Servicios d'Emerxencies, siguiendo instrucciones de la Dirección del Plan, procedieron nesi momentu a desactivar la movilización del  V Batallón d'Intervención n'Emerxencies de la UME con base en San Andrés de Rabanedo en Lleón.

A lo llargo de la mañana solo quedaben  incidentes de poca magnitú nos conceyos de Parres, Villaviciosa y Cangues d'Onís, consistentes fundamentalmente n'achiques d'agua.